My DFMA experience part 2 \ تجربتي مع أكاديمية التجميل دي اف ام اي الجزء الثاني

كيف حالكم ياحلوات

اليوم حتكلم عن الجزء الثاني من تجربتي في اكاديمية دي اف ام أي ,  و زي ماوعدتكم في البوست السابق حاتكلم عن مكياج ايام الثلاثينات و مكياج العروس .

اوكي نبدأ بسم الله

الموضوع الأول

مكياج الثلاثينات

اعطتنا هوا الخبيره

Lyndsey Harrison

دي الخبيره لزوزه ونعومه تتاكد في كل خطوة اذا فهمنا ولا لا . يعني معانا ستيب باي ستيب .

بيانات الخبراء تلاقوه في اليوست السابق 

مكياج الثلاثينات كان اهم شي فيه الحواجب الرفيعه مرا و الشفايف حمرا وغامقة ومرسومه مزبوط والرموش كثيفة و طويلة . طبعا مافي احد يستخدم المكياج دا دحين الا في عروض الأزياء و الفوتوشوت .

اول تقنية استعملناها هي اخفاء الحواجب و استخدمنا الغرا , الغرا ابو اصباع اللي كنا نستعملوا في المدرسة . اول شي تسوي كل خطوات الفلولس فيس و دي اتكلمت عنها في البوست السابق , بس توصلي لمرحلة الكونسيلر وقفي . تجيبي الغرا و تبدأي تمشي على حواجبك الين تسير حواجبك مسطحة فلات تماما وانتبي لاتكتري يروح الغرا يتكتل , بعد مااتأكدتي انو الحواجب سارت فلات جيبي الكونسيلر وغطي الحواجب تماما بالكونسيلر , بعد كدا ارسمي حواجب تانية بلون غامق زي قلم كوفي من ماك بس ارسميه فوق الحواجب الأصليه عشان تسير المسافة بين حواجبك وعينك واسعه . 

ودا فيديو يوضح اكتر :

Concealing Brows using Glue Stick

http://www.youtube.com/watch?v=L-DgezT3-Uk

بعد كدا تحطي المكياج عادي بس تتعاملي مع الحواجب اللي رسمتيها كأنها حواجبك الأصليه يعني حتى الإضاءه تحطيها تحتها .

ومن الاشياء الضروريه في دا اللوك الرموش الكثيفة فطبعا التركيب هو الحل .

بعد كدا الشفايف حمرا واحمر قوي . حددي بالكونسيلر الين يزبط معاكي الشكل .

 طبعا ابدا المكياج مو شكلو طبيعي باين مصطنع و هوا المطلوب في هذا اللوك .

خبيره التجميل اللي كلنا نحبها في اليوتيوب ليزا اتكلمت عن سلسله كاملة عن تاريخ المكياج و الفينتج ميك اب , انا ححط لكم اللنكات حق مكياج الثلاينات لانو الفيديوز مرا عجبتني .

انصحكم تتفرجوا كل السلسه حقت تاريخ الميك اب مرا استمتعت وانا اتفرجها , اظن انها خمسة فيديوهات

Make-up History - Victorian Era to 1930's

https://www.youtube.com/watch?v=Lh12XPiGOzc

Biba Fever!! Vintage 70's/30's style Make-up

https://www.youtube.com/watch?v=jwbggXSCe7c

هنا شويه صور عن مكياج الثلاثينات كمان

الموضوع الثاني

مكياج العروس

اعطتنا هوا الخبيره

Jane Aspinall

الخبيره دي كأنها أم حنونه , تروح للبنات تتاكد من شغلهم هاديه و حنونه .

مكياج العروس في نوعين اما سموكي او سمبل حسب العروس اش تحب , ومن اهم الأشياء الوجه يكون صافي ومنور و مايلمع عشان الصور . المكياج حق العروسه هنا في بريطانيا اكتر من طبيعي , حتى الخبيرة تقول انو مكياج الوصيفات ممكن ياخد وقت اكتر من العروس لانو العروس ماتكتر مكياج وشادو لازم بس تبرزي جمالها الطبيعي .

يعني اساس متناسب مع لونها و وزنه خفيف مو ثقيل

شفايفها استخدم الوان هادئه روز على نود

الرموش افضل تكون مفصله اقصد الاندفيديجوال مو ستريب

الحواجب ابدا مو مرسومه اوفر

ححط لكم بعض الصور عشان تفهموني اكتر

ودا الفيديو حسيتو حلو مرا وشغلها جميل , انصحكم تشوفوه

Bridal Makeup Tutorial: Makeup By Sona

http://www.youtube.com/watch?v=PVhNIpPkzXM

بوست اليوم زي ماشفتو خفيف مرا و يعتمد على الممارسه و التدريب اكتر من الكلام

اخر يوم في الكورس جابو لنا مصور محترف و عارضات , كل واحدة فينا تحط اللوك اللي تحبو ويعكس شخصيتها و تسويه على العارضة حقتها يعني كأنو اختبار كل واحدة تبدع قد ماتقدر .. يلا اش تتوقعوا سويت لعارضتي ؟؟

في البوست الجي إن شاء الله حأوريكم الفيس شارت للوك تبعي اللي عملتو عشان اسويه لعارضتي الجميلة , و الصور النهائية لشغلي . اتمنى يكون البوست عجبكم واستفدتوا منو .

مع حبي

امواااااااه

مرمر

4 comments lifestyle