The Body Shop elixir of nature perfume collection review / ريفيو ذا بودي شوب مجموعة عطور اكسير الطبيعة

Thursday, 1 September 2016

كيفكم ياحلوات

واحشتووووني و احشني التدوين مرا كتير ، طمنوني كيف الاجازة معاكم ؟

اختفيت من المدونه تقريبا لمدة شهر بسبب انه هارديسكي اللي احط فيه كل الصور والشغل خرب ، مرا دا الشي مزعلني .. يمكن زعلانة من نفسي اكتر شي اني ماعملت باك اب ... تخيلوا ماطاح ولاشي فجاه مابيفتح .

الشي دا زعلني لاني كنت مصورة تدوينات كتير تحمس .. ادعوا بس الله يسهل واقدر ارجع البيانات ، و ان شاء الله اذا رجعت على طول افتح في الكلاود واحطها.

المهم حسيت انه مااقدر ابعد اكتر من كده ، واول امس حضرت ايفنت لبودي شوب حمسني و الهمني ارجع واكتب لكم قدايش انا منبهرة بالمجموعة الجديدة للعطور من عندهم.

المجموعة اسمها عطور اكسير الطبيعة ، وهي عبارة عن خمسة عطور مصنعه من مواد نادرة وثمينة و كلها طبيعيه.

رسالة بودي شوب زي مانحن عارفين هي إثراء الطبيعة لا استنزافها و هم بيطبقوها في كل منتجاتهم و طبعا كانت العطور من ضمنها ، كيف ؟

استخدموا تقنية لاستخراج العطر من النباتات من غير ما يضروا النبته و يخربوها ، ويحافظوا عليها في بيئتها الطبيعية.

التقنية هي الهيدسبيس ، فكرته انه يحطوا قزازه فوق النبته و من خلال البخار اللي يتجمع يقدروا يستخرجوا العطر و يضيفوا اضافات عشان تكون ريحتها مطابقة للطبيعة بشكل مايتصدق . عن نفسي صراحة انبهرت لانه دايما فبالي انه العطر لازم يطلع لمن يعصروا النبتة او يجففوها. من جد الشغل اللي بيسوو بوي شوب شغل نبيل و راقي.

هنا صورة توضحلكم اكتر

و من باب العلم ترا حتى القزاز المستخدم للتعليب قابل لإعادة التدوير ، الغطا خشب عضوي .. و الكحول المستخدمة في العطر كحول عضوية و دا الشي يخليها صالحة للاستخدام حتى للشعر. و بالنسبة للثبات فهوعالي اعلى من عطور بودي شوب العادية تقريبا 8 ساعات.

طبعا كل عطر من الخمسة له مكوناته النادرة الخاصة و كل واحد فيهم من مكان مختلف من العالم . و اقلكم شي ترا العطور كلها جميلة مافي ولاواحد منهم ماعجبني . لكن تحسي لكل واحد مزاج و مود مختلف عن التاني.

طبعا غير الباكيجينق زي ماانتوا ملاحظين جدا جدا فخم و مختلف عن اي منتج سابق من بودي شوب . ومازال السعر حلو و في متناول الجميع.

سعره 199 ريال.

في الايفنت اعطونا اختبار لو عملتيه ممكن يسهلك عملية اختيار العطر المناسب لك ، و دا الاختبار موجود في كل الافرع دحين ، و على فكره نزلت العطور هنا في الشرق الاوسط قبل اي مكان في العالم.

وفي القودي باق كان في كتيب لزيز شارحين فيه مكونات كل عطر فراح احط لكم صور ممكن تقدروا تتخيلوا شويه.