the body shop FRESH NUDE FOUNDATION review / ريفيو فاونديشن ذا بودي شوب فريش نيود الجديد

كيفكم ياحلوات

اليوم التدوينة خفيفة ولزيزه ، هي عن تجربتي مع فاونديشن ذا بودي شوب الجديد.

FRESH NUDE FOUNDATION

الفاونديشن من اسمه (فريش نيود) ، يعطي لوك ديوي و فريش ، وفي نفس الوقت يبان كانه بشرتك الحقيقيه مو 

طبقة فاونديشن.

بالنسبة للشهور الحاره عندنا الربيع و الصيف ، اعشق الفاونديشنز اللي كده ، مستحيل اتحمل طبقه في دا الحر.

التغطية من خفيفة الى متوسطة ، واللون جدا مناسب يعني المجموعة المتوفره من الالوان واسعة مرا بسهوله تلاقي اللون اللي يناسبك ، عندهم 16 درجه منه فتعتبر مجموعه كبيره نوعا ما.

درجتي واضحه في الصورة (مكتوب على الفاونديشن من قدام).

ريحته خفيييفة جدا وجايه على ورد لانه من مكوناته موية الورد الانجليزي و الصبار ، طبعا من مكون الصبار باين انه الفاونديشن مرطب و مريح في الاستخدام والتوزيع. انا كبنت بشرتها مختلطة مايلة للجافه جدا ناسبني و ذكرني كتير بالعشق الاول بورجوا هيلثي مكس.

من مميزاته كمان انه فيه نسبه حمايه من الشمس 15 اس بي اف ، هو مو كفايه طبعا بس شي احسن من شي هههههه ، و من وجهة نظري أحس الفاونديشن دا نهاري أكتر.

تعليبه يعتبر اساسي و عملي يميل للفخم لانه قزاز و غطاه اسود ، والحمد لله يارب انه في ضغاط لاني دايما بعاني مع فاونديشن نارس وغيره.

بالنسبة للسعر مني متاكده لانه بودي شوب اهدوني هو في ايفنت (من اكتر الايفنتات البروفيشنال اللي مرت عليا) ، بس في الموقع البريطاني سعره 15 باوند يعني مو اكتر من 100 ريال ، صراحة حلو و يستاهل.

العيب الوحيد اللي لقيته فيه الثبات ، لاحظت بعد تقريبا 6 ساعات يبدا يخف ، هو يمكن 6 ساعات كفايه للبعض بس ليا لا للاسف واتوقع كتير زيي.

دي كانت اول مرا اجرب فاونديشن من بودي شوب واعتبرها تجربه حلوة و بإذن الله حكررها، اتمنى التدوينة 

عجبتكم واستفدتوا منها ، نشوفكم على خير التدوينه القادمة.

8 comments Beauty