Sigma Essential Kit - Mrs. Bunny review / ريفيو مجموعة الفرش الأساسية من سيقما - مستر بني

كيفكم ياحلواتي

اليوم التدوينه حتكون ريفيو عن واحدة من اشهر مجموعات سيقما لفرش المكياج ،الريفيو حيكون عن مجموعه

Essential Kit - Mrs. Bunny

 المجموعه الاساسية مستر بني 

 

المجموعه من اشهر المجموعات عندهم و اتوقع شفتوها كتير سواء في اليوتيوب او انستقرام، تجي بالوان مختلفة و كمان بأحجام مختلفة (فيه منها حجم صغير للسفر) .

و تتكون المجموعه من 12 فرشة اساسية و علبة لحفظ الفرش مرا عملية لانه تفتحيها و تحطيها على تسريحتك فيسير الوصول للفرش أسهل وأسرع وكمان أشيك وأحلى.

دي صورة للعلبة تبعي

صورة للمجموعة من موقع سيقما 

اللون اللي اخترته هو السماوي الفاتح و سار لي فترة طويلة بجرب فيها و دحين اقدر اقولكم رايي فيها و هل تستاهل ولا لا ؟؟ 

الصراحة انا منبهرة جدا بجودة فراشي سيقما ،اتعب واقول ممتازه و عملية و بروفيشنال كمان، شعراتها ناعمة بشكل معقول بحيث انها تلقط كمية معقوله من المنتج ، وقت التنظيف مايطيح شعرها و لمن تنشف ترجع ناعمه واطرافها بيضا كانها جديدة. 

يعني بالنسبة لسعرها فهي تستاهل لانه لو اتخيلنا المجموعه نفسها من ماك فبالراحة حيكون ضعف السعر ،هنا الجودة نفسها و بسعر اقل، هو كتير ناس يصنفوها ضمن الفراشي الغالية بس ترا مرا تستاهل بالذات لو اتقارنت بالماركات التانية. 

من ميزات موقع سيقما انهم يشحنوا انترناشونال في مكان محا تكوني يوصلوا لك وكمان كتير تاجرات ساروا يوفروها فسار الوصول ليها اسهل نوعا ما.

حتكلم الان عن كل فرشاه و اش استخدامها (طبعا مو لازم اذا كانت مثلا فرشاه فاونديشن انك تتقيدي ،بالعكس استخدميها الاستخدام اللي مرتاحة فيه و حتبدعي اكتر و ممكن الفرشاه الواحده تستخدميها اكتر من استخدام).

حبدا بالفرش من اللي احبه اكتر للاقل و عموما مافي فرشاه في المجموعه مااستخدمها لانها تعتبر مجموعه اساسية و كل اللي فيها مهم ، وقبل لاابدا ابغا اوضح لكم نقطة مهمه:

الفرش اللي اسمها يبدا بحرف F  معناها مخصصه للوجه

الفرش اللي اسمها يبدأ بحرف   E معناها مخصصة للعين

اووووكي نبدا بسم الله 

 

E40 - Tapered Blending

فرشاة الدمج للعين ، ادمج فيها الشادو في منطقة عظمه العين و غالبا يكون الشادو مطفي عشان يعطي عمق للعين ،الفرشاه مرا تساعد في عملية الدمج بنعومه فيبين بروفشنال و نظيف،عموما الدمج للشادو من اهم المفاتيح للمكياج الاحترافي.

ممكن استعملها احيانا لمن اعمل كونتور للانف.

 

E30 – Pencil

فرشاه المرسمة (يمديكم على الترجمة بس هههه) الفرشاه دي خطيرة لدمج الشادو بشكل خفيف على خط الرموش من فوق او من تحت ،على فوق مرا حلو لو تبغي تموهي شادو غامق بدون ماتحطي ايلاينر.

وكمان من استخداماتها الحلوه لمن تحطي شادو فاتح على مدمع العين.

وممكن لمن تركزي الشادو الغامق على طرف العين او الجفن الثابت (زي مكياج الريترو).

 

F70 – Concealer

الفرشاه الحلوة دي مخصصة للكونسيلر بالذات للمحلات الصغيره زي حول الانف وتحت العين،بس انا مااستخدمها كدا استخدمها لمن بحط لون شادو على الجفن المتحرك وخصوصا الالوان الشيمريه و الميتاليك مرا يطلع بيرفكت.

 

E55 - Eye Shading

دي الفرشاه الصح عشان احط اللون على الجفن المتحرك ، من ميزاتها انها صغيره و ملمومه فتاخد كمية كبيره من اللون وتركزه على الجفن ،عشان دا السبب انا اعشق استخدمها لمن اتعامل مع الشادوز الغامقة خصوصي الاسود لمن اعمل سموكي وبدي اركز الاسود على الجفن المتحرك مرا مرا تساعدني في تركيز اللون.

 

F50 - Duo Fibre

فرشاه باودر ممكن تستخدميها مع المنتجات الكريميه او الباودرية سواء كان فاونديشن او بلاشر او اضاءه و ممكن كمان مع البرونزر.

انا احب استخدمها مع الباودر العادية و تعطي فينش جميل و فلولس.

 

F40 - Large Angled Contour

فرشاه الباودر المايله او المشطوفة ،هي مخصصة للكونتور حق الوجه و مرا جميلة للاستعمال دا ، احب استخدمها اكتر للبلاشر و الاضاءة.

 

F30 - Large Powder

اكبر فرشاه في المجموعة تستخدم مع الباودرز سواء للوجه او للجسم ،احب استعملها للبرونزر لاني مااحب يكون مركز في الوجه فبالفرشاه دي يسير مموه و مو مركز وفي نفس الوقت يسوي المطلوب.

 

E70 - Medium Angled Shading

 

فرشاه الدمج المايلة تستخدم لمدمج الشادو تحت الحواجب ، وكمان للدمج بشكل عام ،احب اكتر شي استخدمها على دمج الشادو في الطرف الخارجي عشان يعطي افكت الكات ايز.

 

E05 - Eye Liner

فرشاه رفيعه للايلانير ، للان دي اكتر فرشاه احب ارسم فيها بالجل لاينر.

 

E65 - Small Angle

فرشاه مشطوفه ممكن تستخدم للشادو او للكريم للعين او الحواجب، من احلى الاستخدامات لها برضو للجل لاينر مرا تخليه سهل و تزبط الفليك بدون ماتتعبي معاها.

 

E60 - Large Shader

فرشاه كبيره للعين مرا حلوة لو بسوي بيس او اساس للعين تحطيه بمسحة واحدة يغطي كامل العين و اقدر استعمله مع منتجات كريميه او باودر.

 

F60 – Foundation

من اسمها هي فرشاه للاساس او الفاونديشن ، انا مرا ماتعجبني لتوزيع الفاونديشن واستخدمها للاضاءه الكريمية.

و للاساس احب استخدم فرشاه من خارج المجموعة وهي F80 اتكلمت عنها كتير من قبل و برضها من سيقما حبيبه قلبي.

المجموعة جميلة مرا و لو واحدة تبغا تبدأ مجموعتها الفرشيه الخاصة انصحها تاخد المجموعة دي و تضيف لها فرشاه الفاونديشن اف80 .

رابط سيقما للمجموعه

http://www.sigmabeauty.com/Mrs_Bunny_Essential_Kit_p/bblu.htm

و رابط فرشه اف80

http://www.sigmabeauty.com/Sigma_Flat_Top_Synthetic_Kabuki_F_80_p/f80.htm

دا كان بوست اليوم اتمنى تكونوا استمتعتوا واستفدتوا منه

اذا عندكم اي سؤال انا موجوه في

تويتر  @murmur_blog

انستقرام murmur_blog

ايميل m.samarkandi@gmail.com

احبكم

مرمر

1 comment Beauty