كيف حالكم جميلاتي
واحشتووووني كتير ...
اليوم إن شاء الله حتكلم عن مفضلات شهر فبراير ، ماعملت ليناير
لأنه كان تقريبا نفسه حق مفضلات 2013 اللي كتبت عنه هنـــــا.
نبدأ بسم الله
bourjois healthy mix foundation
فاونديشن هيلثي مكس من برجوا هو تقريبا اكتر تركيبة عجبتني من
فاونديشنات الدرق ستور ، تغطيته من متوسطه لخفيفة و يينفع للصباح والدوام ماتحسي
بشي تقبل على الوجه.
الفيشنش حقته ديوي يعني يعطيكي بشره ندية وصحية، أحب أوزعه
باصابيعي أو بفرشه سيقما اف80 المفضلة عندي للفاونديشن السائل.
hourglass ambient lighting palette
باودري المفضل كتبت عنه بالتفصيل هنـــا
sleek eyebrow kit
باليت سليك للحواجب ،الشهر الماضي ركزت على الباودر اكتر من
الواكس لانه طبيعي اكتر للصباح ، مرا الدرجة ناسبتني و تطلع شكل الحواجب طبيعية وفي
نفس الوقت مرتبه.
نفسي الاقي درجة شادو تشبهو (اللون اللي على اليمين) ،اش عندكم اقتراحات لشادو بنفس
الدرجة من ماك وينفع للحواجب ؟
too faced a few of my favorite things
باليت توفيسد من اكتر الاشياء اللي حبيتها لانها حق كلو ،شادوز، بلاشرز وبرونزرز.
الوان الشادوهات جميلة وتستخدم دايما سواء للصباح او
للمناسبات وفي منها مطفي و فروستي و قلتري يعني كل الفينيشز، ومايحتاج اتكلم عن تركيبة شادوهات توفيسد ،من رايي هي الأقرب لشادوهات
اربان ديكاي المفضلة عندي ، ملمسها ناعم زي الزبدة والالوان واضحة و بيجمنتد.
في الباليت لونين بلاشر واحد وردي مع شويه لمعه و واحد مشمشي
مطفي ناعم ، وفي كمان لونين برونزر واحد بلمعه خفيفة و التاني المطفي هو برونزرهم
الشهير تشوكليت سوليه، مراااا حبيت التشوكليت سوليه انبسطت اني جربته واقتنعت بيه
قبل لااجيب الحجم الكامل ودا من اهم ميزات الباليتز وبالذات حق مواسم الهولداي او
الكريسمس. تقدري تجربي كم شي في واحدة كوليكشن.
انا اخدتها من سيفورا مجمع العرب بس والله مرا نسيت السعر
سامحوني.
Sumptuous Extreme Lash Multiplying Mascara
دي الماسكرا جاتني هدية مع مجموعه من استي لودر جربتها وحبيتها
جدااا ، ماتكتل و سوادها حلو تكثف اكتر من انها تتطول، حاجيب
الحجم الكامل إن شاء الله.
No7 Moisture Drench Lipstick in Mulberry
estee lauder pure color long lasting lipstick in blushing
روجين حبيتهم ولمن جيت اصورهم اكتشفت انهم يشبهو بعض كتير هههه
، الاول الحلو دا من نمبر سفن لونه روزي لحمي ،مرا جميل تقدري تحطيه بشكل خفيف او
بشكل تقيل ، تركيبته كريميه ناعمه و تقعد فتره طويلة.
التاني من استي لودر لونه برضو روزي بس على كورالي اكتر ،مرا
ناعم وكريمي لونه فريش وينااسب كتير الوان بشرات.
estee lauder pure color long lasting lipstick in blushing
No7 Moisture Drench Lipstick in Mulberry
No7 Stay Perfect Nail Colour in Highland Mist
انا مو مرة مع المناكير مااعرف ليش يمكن عشان ظفري مرة صغير و
مو أي لون يناسبه ، اللون دا حطيته كم مرة وعجبني يعتبر مايل اكتر للنودي الوردي،
لونه مرا ناعم ويعطي اليد نعومه كمان، بس مناكير نمبر سفن لازم تحطي فوقها توب كوت
كويس لانها ممكن تتقشر ، انا احب استخدم التوب كوت حق سالي هانسن ومرتاحة عليه
كتير.
inglot brush cleaner
منظف الفرش من انجلوت ، جميل للتنظيف السريع ، دايما احب انظف
فرشي تنظيف سريع بشكل شبه يومي عشان الجراثيم والتنظيف العميق كل ثلاثة اسابيع
لشهر.
البخاخ حلو وعملي استخدمته كتير وحبيته لانه من جد يفك ازمة
بالذات لو كنتي مستعجلة ومافي وقت تنتنظري الفرشة تنشف.
dermacol bb wash 8in1
منظف من ديرماكول مرا ناسبني لانه نفس تركيبة البالم كلينزر
يعني ممتاز للبشرة الجافة زي حالاتي ، يجي زي الكريم التقيل تفركي وجهك بيه و
تمسحيه بقطنه مبلولة يترك الوجه نظيف ومترطب في نفس الوقت.
victoria secret candlelight violet hand and body cream
كريم لليد والجسم من فكتوريا سيكرت ، ريحته فريش تحسيه سويت
على ورد مااعرف ايش بالضبط شي جميل، اذا مريتي من عندهم جربيه ان شاء الله يعجبك.
وكريمات فكتوريا لاحظت انه البشرة تمتصها بسرعة وماتلصق وتتطفش
، انا استخدمه مباشرة بعد الترويش والبس ملابسي ماحسيت ابدا انه يلصق في الملابس
ويزعجني بالعكس خفيف بس يرطب من قلب.
دا كان بوست اليوم اتمنى تكونوا استمتعتوا واستفدتوا منه
اذا عندكم اي سؤال انا موجوه في
تويتر @murmur_blog
انستقرام murmur_blog
ايميل m.samarkandi@gmail.com
احبكم
مرمر
عوافي يا مرمر
ReplyDeleteوحشتنا مدوناتك الحلوة زيك
يعطيكي الصحة و العافية
و في انتظار الجديد منكم دائما
^_^