MUFE artist palette volume 1 - Artist Plexi-Gloss review \ ريفيو باليت ارتيست الجديد للظلال و البلكسي قلوس من ميك اب فوايفر

كيف حالكم ياحلوات

واحشتووووووني ... اليوم حتكلم عن منتجات جديدة من ميك اب فوايفر واللي هي باليت الشادوهات و القلوسات .. نزلت قريب عندنا و تلاقوها في سيفورا و في محلات ميك اب فرايفر.

نبدا اول شي بباليت الشادوهات

قبل فترة ميك اب فوايفر غيروا شادوهاتهم ونزلوا تشكيلة كبيييره من الالوان المختلفة والفينيشز واللي اسمها الارتيست شادوز، كانت الريفويهات عليه مرا تحمس و تقريبا كلها كانت ايجابيه باستثناء انه السعر غالي على لون واحد .. مع العلم انه الشادو الواحد حجمه كبير اكبر من الاحجام اللي تعودنا عليها فنوعا ما يستاهل سعره.

صراحة كنت ناوية اسويلي باليت من 3 الوان لكن كل مرا احتاااار و اقفل والحمد لله اني مااستعجلت لانه فوايفر سوو باليتين تناسب كل الاذواق ...

الباليت اللي رقمه 1 او الباليت الاول فيه درجات البنيات الطبيعيه

الباليت اللي رقمه 2 او الباليت التاني فيه درجات ملونه اكتر

طبعا اخدت الاول بحكم اني حاستخدمه بشكل اكتر. السبب الرئيسي اللي حمسني اخده انه الشادوهات اللي فيه هي نفسها الارتسيت شادوز اللي نفسي اجربها.

حجم الشادو الواحد اصغر من الشادو العادي ، وممكن طبعا انك تشتري الشادو لحاله. وقيمة الباليت الفعلية بالمنتجات اللي فيه 136 دولار لكن بتتباع بقيمة 42 دولار ( الاسعار جبتها من موقع سيفورا).

هنا اظن 175 ريال في بوتيكات ميك اب فوايفر و سيفورا.

انا اشوف مقاس الشادو اللي في الباليت ممتاز لاهو مرا كبير ولامرا صغير تقريبا قد الكوين النص ريال يعني أكبر من شادوهات باليتات كوستال.

الباليت حجمها حلو و نحيفة ، مصنوعة من الكرتون القوي ، تتقفل بالمغناطيس و يجي معاها كتيب يعلم لوكات مختلفة.

الالوان اللي تجي معاها

بنفس ترتيب الباليت

http://www.temptalia.com/make-up-for-ever-1-artist-palette-nudes-you-need-review-photos-swatches

اكتر لونين حابتهم و طايحه فيهم الفتره دي هم اول لونين من العمود الاول .. الدهبي مرا مرا جميل على مدمع العين و البرونز يجنن على الجفن المتحرك.

نجي على تجربتي معاها

من احلى الباليتات الطبيعيه اللي عندي الجودة راااائعة ، الالوان واضحة وصريحة ، ملمسها ناعم كانه زبده، سهله في الدمج  وجدا جدا ثابته اكتر من 10 ساعات بيقعد معايا.

وحبيت كمان انه فيها لون اسود ، اللون الاسود من الالوان الاساسيه في رايي لازم تكون في اي باليت.

صراحة مرا اتحمست اجرب درجات اكتر و فينيشز اكتر.

بيني وبينكم حمسني على الباليت التاني اللي فيه الوان بس بحاول امسك نفسي ههههه.

ملاحظه وحيدة عندي :

ياريييت اضافوا لون بيج مطفي و بني مطفي ، يعني صراحة الباليت حتكون بيرفكت لو كان فيها درجات مطفية.

غير كده الباليت رائعه و مرا انصح فيها اذا تحبي الالوان الطبيعيه و كمان تبغي تجربي شادوهات جديدة و تستاهل.

نجي على المنتج التاني اللي اخدته من عندهم

هي البلكسي قلوس (القلوسات الجديدة من فوايفر)

صراحة انا لمن دخلت البوتيك ماكنت ابغا الا الباليت بس الآنسة اللي في المحل حاولت تقنعني اني اجرب القلوسات الجديدة و فعلا قدرت ، و اشكرها صراحه لان القلوسات من احلى القلوسات اللي جربتها قبل كده.

اللون قوي جدا كانو روج و روج مرا قلوسي ، و الحلو كمان انه اللون يفضل معاكي تقريبا 4-5 ساعات بشكل مريح لايدبق و لايضايق ، تخيلوا قلوس يثبت قد كده!!!

الابليكيتور اللي معاه شكلوا مرا غريب و بالعنيه مسوينها كده عشان توزع اللون بشكل حلو و بتقنية لزيزة اسمها

lip-hugging

يعني كانها تحضن الشفايف .. كيوت الاسم صح ؟

هنا صورة من النت للابليكيتور لاني نسيت اصولكم هو

في منها حتى الان 35 لون و بفينشيز مختلفة ، شي لؤلؤي شي لا .. شفاف مو شفاف على حسب اش تفضلي.

الالوان اللي اخدتها

204

اللون لحمي مزيج بين الوردي و بني بس يميل اكتر للوردي.

بنات لو تبغوا تجربو لون واحد بس فخدوا اللون دا مرا فضييع و يناسب جميع الوان البشرة ، اكتر لون حبيته و انصح فيه من الكوليكشن.

وهنا سواتش من النت

https://beautifulbuns.wordpress.com/2015/03/22/sneak-previewswatches-new-make-up-for-ever-artist-plexi-gloss/

104

اللون يميل للنود اكتر ، انا احب القلوسات النود عشان تقدري تستخدميها لحالها او مع لون تاني، فبالنسبة ليا دا اللون كان البيرفكت نود في المجموعة.

وهنا سواتش من النت

https://beautifulbuns.wordpress.com/2015/03/22/sneak-previewswatches-new-make-up-for-ever-artist-plexi-gloss

اتمنى تكون التدوينة عجبتكم و استفدتوا منها ونشوفكم على خير التدوينة القادمة.

  

4 comments Beauty