كيف حالكم بنات
اليوم الموضوع حيكون مشتريات، اتوقع مافي
احد مايحب مواضيع المشتريات وانا منكم مرا تعجبني، فجاه حسيت نفسي ملقوفه ههههه.
المهم ، المشتريات دي هي حصيلتي من فتره
البلاك فرايداي والسايبر مانداي حقت العام 2015 . كلها اشتريتها اون لاين و شحنتها
عن طريق خدمة التجميع من ورلد شيب.
اذا حابين تتعرفوا على الخدمة اكتر اعملوا
سيرش في قوقل و حتلاقوا شروحات جدا كتيرة.
مشترياتي من موقعين
الموقع الاول هوا بيوتي دوت كوم ، عملوا
عرض تخفيض 20% ، الموقع مرا جميل و في
براندز مرا كتير يعني حبيت تجربتي معاهم، انصحكم تقلبوا فيه وتتفرجوا.
هنا رابط الويب سايت
المشتريات من اليمين
clarisonic mia 2
اظن اني اخر واحده اجرب الكلاراسونيك ،
طبعا الخصم مرا اثر في سعرها ، اخدت منها اللون الازرق الاستوائي ، حسيته منعش و
نظيف ههههه .
هو انا مخربطة اخدته من بيوتي دوت كوم او
نوردستوم بس كلهم يوفروها وكانوا عاملين عليها خصم 20 بالميه.
إن شاء الله استخدمها فترة واقولكم رايي
فيها ، يعني في ريفيو قريب.
too faced melted Chihuahua
من لاين الملتد من توفيسد اخدت ميلتد
شيواوا ، احب اللاين حق الملتد مرا الوانه صريحه ، ثابته و فيها نسبة ترطيب كمان.
اللون دا لون نيود و كتير انشهر في
السوشيال ميديا انه يشبه ماك فيلفيت تيدي.
هنا صورة مقارنه من النت
http://www.dupethat.com/2015/06/too-faced-melted-chihuahua-dupes.html
urban decay revolution lipgloss duo
من اربان ديكاي ، ميني قلوس لونين مع بعض لون
نيود ولون فوشي ، حبيت الفكره لاني ماجربت قلوساتهم لسا و سمعت عنها مرا مدح حلو فمتحمستلهم.
الدرجات اللي فيها
النيود
LIAR
الفوشي
ANARCHY
نجي على مشتريات ذا بالم
ذا بالم اكتر موقع قوي في تخفيضات السايبر
مانداي ، يعمل خمسين بالميه على كل الويب سايت.
اللي سار انه السنه جهزت نفسي و عبيت السلة
وباستنا تبدأ ساعة التخفيض (في العادة يعلنوا عنها في اكاونتهم في انستقرام) ، والا
فجاه خرب الموقع من الضغط المفاجيء. طبعا انتظرت و انتظرت في الاخر نعست ونمت و اليوم
التاني الاقي كتير حاجات من اللي كنت ابغاها سارت سولد اوت.
بس الحمد لله برضي لحقت جبت حاجات حلوة ،
لانه على نهايه وقت التخفيض مابقي شي في الويب سايت.
نجي على المهم اش اخدت ؟
Meet Matt(e) Hughes
من اليمين التلاته العلب الطويله هي
الارواج السائلة الجديدة ، طبعا السنه هي سنه الارواج السائله و الكونتور ههههه ،
ان شاء الله اجربهم كويس و اعطيكم رأيي فيها في بوست منفصل.
Betty-Lou Manizer
برونزر\هايلاتر\شادو ، مااتوقع محد يعرفو ،
من اجمل المنتجات عندهم و دا جبتو باك اب بما انه عندي منه و استخدمه كتير واهم شي
بنص السعر.
Balm Desert
برونزر\بلشر ، مستغربه اني ماسمعت عنه كتير
في السوشيال ميديا ، يمكن كنت مشغوله شويه ههههه ، لاني متاكده انه جودة بلاشرات
بالم ممتازه فقلت لازم اجربه.
Sexy Mama
كنت محتاجه بودرة تثبيت شفافه ، قلت اجرب
حقت بالم .. إن شاء الله تتطلع كويسه و ماتجفف بشرتي.
How 'Bout Them Apples?
باليت من البلاشرات الكريميه ، زي ماقلتلكم
اي شي بلشر لازم اجربه . و عن نفسي احب
الكريمي لانه يعطيني اللوك الديوي اللي احبه.
دي كانت مشترياتي اتمنى تكون عجبتكم
واستفدتوا منها.
اذا في اي منتج حابين اتكلم عنه بشكل مفصل
بليز اكتبولي كومنت ، و نشوفكم على خير التدوينه القادمة.
0 comments:
Post a Comment
تسعدني تعليقاتكم أو استفساراتكم :-)