Makeup Forever Ultra HD foundation stick review / ريفيو فاونديشن ميك اب فورايفر الترا اتش دي ستيك

كيف حالكم ياحلوات

قبل فتره ميك اب فوايفر ارسلولي الفاونديشن الستيك الالترا اتش دي و الكونسيلر الترا اتش دي ، شكرا ميك اب فورايفر.

سار لي اكترمن اسبوع قاعده استخدمهم و اعتقد اني حقدر اعطيكم رايي فيهم .. البوست اليوم حيكون عن الفاونديشن ، الكونسيلر حكتب عنه في تدوينه منفصلة عشان لايسير موضوع طويل وممل.

اوكي نبدأ بسم الله

اول ماشفت انه الفاونديشن على شكل ستيك صراحة خفت ، لانه بشرتي جافه و عمري مافكرت اشتري فاونديشن ستيك لايروح يبين العيوب و الجفاف اكتر. بس لمن قريت عنه و دورت عرفت انه الفاونديشن دا من مكوناته كتير زيوت يعني لازم يكون فيه نسبة ترطيب فاتحمست اجربه.

على فكره الاتش دي القديم كنت مرا احبه بس بعدين سار يبين القشور في وجههي فوقفت استخدمه.

بالنسبه للستيك ، ابدا ماتوقعت يعجبني بالطريقة دي ، سهل في الدمج، التغطيه فل كفر و ممكن تحطي اكتر من طبقه عشان تزيد التغطية.

الفينيش اللي يعطيكي ديوي و هو المفضل عندي طبعا.

بشرتي زي ماقلتلكم جافه فاتوقع حيناسب البشرات الجافه والمختلطة مااعتقد حيناسب الدهنيه كتير ، احب استخدمه لحاله مااحط معاه باودر ، مرا حطيت و حسيت مبين مغبر ، بدون مرا احلى.

جربت التوزيع بفرشاه سيقما اف 80 ، اصباعي و البيوتي بلندر كلهم نتيجتهم جميلة تقريبا نفس النتيجه ، بس البيوتي بلندر مرا اسرع واسهل في الدمج.

الفاونديشن فيه درجات مرا كتير اكيد حتلاقي شي يناسبك ، والحلو انه مع كل درجه حاطين الحرف حق الاندر تون.

يعني لو اندر تونك احمر حيكون الحرف

R

ولو اندرتونك اصفر حيكون الحرف

Y

وحاطين الرقم القديم في فاونديشنات الاتش دي واللي يناسبها من التركيبات الجديدة الالترا اتش دي.

وطبعا مو شرط يكون استخدامه فقط فاونديشن ، هم ارسلولي درجه فاتحه و درجه غامقه ، الفاتحه تقريبا نفس درجتي بس الغامقه طلعت بيرفكت للاستخدام ككنتور ، بفكر اجيب شي افتح استخدمه كهايلايت.

التعليب جدا عملي انه ستيك و علبته بلاستيك ممتاز للحل و الترحال هههههه .

باختصار و بصراحه يستاهل المدح والضجه اللي عاملها ، في ناس سموه فوتوشوب البشره ههههه حبيت الاسم.

اتمنى التدوينة عجبتكم و استفدتوا منها ، نشوفكم على خير التدوينه القادمة.

2 comments Beauty