كيف حالكم عسولات
اول شي اعتذر عن التاخير في تنزيل المدونة
لاني الاسبوعين اللي فاتو كنت شويه مشغولة . وإن شاء الله اعوضكم بتدوينات اكتر و
أحلى .
اوووكي نبدأ بسم الله
اخر يوم الاكاديمية يجيبوا لنا العارضات و نشتغل عليهم و بعد كدا جلسة تصوير مع المصور . وفي الأخير يسير
توزيع الشهادات.
قبلها بكم يوم اعطونا ارقام تلفونات العارضات عشان نتواصل معاهم ونتعرف
عليهم،العارضة حقتي مره طيبه وهادئة اسمها لورا.
ححط لكم معلومات المصور
Roger Charles
Photographer
Roger Charles photography
المصور ماشاء الله مرا متمرس وفاهم شغله . طبعا أعطانا كم
تريك مفيدين جدا اثناء التصوير .
انصحكم تشوفوا الصور في موقعوا جدا جميلة .
كلكم اكيد مستيتن الصور النهائية للعارضة
حقتي ومتحمسن تشوفوا اللوك اللي سويته لها .
لمن جيت اختار اللوك اللي ابغا اسويه
افتكرت كلام المدرب الفرنسي لمن قالنا حاولوا تختاروا شي يعكس طبيعتكم وبيئتكم، طبعا اول شي جا في بالي المكياج العربي، الايلانير العريض الرموش الطويلة والمجوهرات
الذهبية .
وقلت مابدها تفكير حاسويها، و فعلا نزلت
السوق قبلها بيوم اخترت للعارضه سلسال ذهبي عريض، بناجر ذهبيه
،اظافر سودا، و
رموش طويلة وكثيفة.
حسيت وانا اقضي كأني اقضي للعبتي العروسة عشان البسها ههههههه
.
طبعا هم من قبلها قالوا لنا انو التصوير
حيكون من جهه الوجه والرقبة .
وعملنا اللوك على الفيس تشارت عشان يكون
قايد لنا .
يوم التصوير كان تجربة جديدة بكل المقاييس، الفوتوشوت الفلاشات القوية اللي فيها، الخبرات و المعلومات اللي اعطونا هيا سواء
الخبيرة حقتنا او المصور . كان من اجمل الايام فعلا واكترها فائدة.
بعد الفوتوشوت عرفونا على قروبهم في الفيس بووك، وهوا قروب مغلق مايدخلوه الا
طلابهم، على القروب دا يرسلوه وظايف و اسئلة واستفسارارت كلها متعلقة بالمكياج
طبعا، و مرا متفاعلين فيه دايما يردوا ويساعدوا.
بعد كدا سوو لنا بوفيه غدا لذيذ.
واخيرا اعطونا الشهادات اللي مكتوب فيها
اني والحمد لله اصبحت خبيره مكياج معتمدة .
والمصور بعدها باسبوعين ارسلنا صور
الفايبنل شوت
دي صور شغلي
ودا صورة قريبه للعين
ها ايش رايكم ؟؟
اتمنى انكم استفدتوا معايا في طرح تجربتي
في الكورس، حاولت احكيكم بالتفصيل عشان تستفيدوا معايا .
ماتصدقوا كمية التعليقات الحلوة اللي
جاتني من الأجزاء السابقة كلها حافظتها في جوالي عشان اشوفها واتحمس وانبسط، الف
شكر لكم ولدعمكم .
امواااااااه
مرمر
أول شي مبروك التخرج من المعهد يا مرمر
ReplyDeleteخلاص حضرتك صرت خبيرة معتمدة و بشهادة كمان
^_^
بعدين عجبتني فكرة رسم المكياج على الشارت
من جد تحسسي الوحدة أن الشغل محترف
و بعدين تسلم يدك على مكياج الموديل الحلو
و ضحكتيني لما اشتريتيلها سلسال و أظافير و رموش
من جد كأنها عروسة باربي
شكرا لمشاركتنا تجربتك في دي الأكاديمية للتجميل
و بانتظار الجديد منكم
ألف مبروك الشهاده مرمر .. كالعاده مره استمتعت بموضوع واسلوب طرحك يشد الانتباه .. ابدعتي طبعا في كل المراحل وخاصتا في تطبيق الميك اب علي العارضه وحبيت فكرتك انك اعتمدتي الميك اب العربي..
ReplyDeleteسمر
أعذريني بس أبدا أبدا الميك أب مش مناسب للعارضة كفكرة حلو بس التنفيذ على وجهها ما يليق عليها و أهم شيء يكون فيه تنفيذ يجيب الفكرة صح و يليق ع المودل هنا تكون الصعوبة و بالتوفيق
ReplyDelete
Deleteمع احترامي الشديد لكي ولرأيك بس صعب القى موديل بملامح عربيه في مجتمع بريطاني , غير اننا صممناالفيس تشارت قبلها بيومين قبل لانشوف الموديل والشطاره اننا نفذنا الفيس شارت صح على الموديل ولقى اعجاب كبير من الخبراء اللي اشرفوا علينا
, شكرا لك ياعسل شرفتيني :-)
ااتتتتتتت
ReplyDeleteالله يوفقك يارب ومبروك الشهاده شغلك على الفيس شارت جميل ولاكن للاسف على العارضه لم يكن جميل واقصد رسمة العين وهيا الاساس في الرسم نهاية خط الاي لاينر مائله ومقوسه لم تكن مستقيمه مما اعطاها منظر ليس جميل
ReplyDeleteعيون العارضه مبطنه ولم تقومي بإبرازها لاكن ان شاء الله تتدربي مع الايام ويصبح لديكي خبره اكثر حاولي ان تستغلي اكثر وتجربي على الناس اكثر لان الشهاده وحدها ليست مقياس لتقيم الشخص بل الشغل النهائي هو من يحكم اتمنى ان تحققي طموحك وتصلي الى ماتريدي اليه وتصبحي خبيرة مكياج مشهوره بجمال عملها بإذن الله
ReplyDeleteيعطيك العافيه و مبروك الشهادة - بصراحه انصدمت بشكل العارضه بالنهاية توقعت أفضل.!!!!
ReplyDelete