تجربتي مع مكياج سلييك / My experience with sleek makeup

كيفكم ياجميلات

اليوم بأشارككم الكوليكشن تبعي اللي من سليك و اقولكم رأيي وتجربتي معاهم، كتير بنات طلبو مني البوست دا لانو يبغو يطلبو بس محتارين، إن شاء الله البوست يفيدكم و يساعدكم .

طبعا اللي مو عارف سليك هيا ماركة بريطانية موجودة في محلات سوبر درق في بريطانيا، و كتير تاجرات ساروا 

يوفروها لانو الطلب عليها كثير .

انا عن نفسي جربت بلاشرز و شادوز و كيت الحواجب والكونتور

(ترا انا بلشر كوين اعشق شي اسمو بلاشر يعني لو قالولي اختاري مستحضر مكياج واحد في الحياة حاختارالبلشر اكيد)

طيب حبدأ بالبلشرز

بس ابغا اوضح نقطة مهمة

انا بشرتي لونها ميديم يعني بيج غامق شويه

هوا الألوان تناسب كل الوان البشره لانها مرا واضحة ومركزة بس لو تحبي تاخدي شي بالضبط يناسب لونك افضل انو

لو كنتي بيضا مرا اختاري المشمشي

بشرتك ميديم اختاري البرتقالي او الوردي الروزي

بشرتك غامقة اختاري الاحمر او الارجواني

طيب نشوف البشلرز عن الفلسفة الزايدة ههههه 

اول شي العلبه انيقة جدا فعلا سليك ومرتبه و فيها مرايه كبيره، مايجي معاه فرشاه (أحسن بالنسبة ليا).

المنتج نفسه من اهم مميزاته انو الوانو بيجمنتت مرا مرا يعني خدي بالك وانتي تحطي مسحة خفيفة مرا على الفرشاه تكفي، الكواليتي روعه و يقعد على الوجه فتره طويلة مايختفي زي بعض البلشرز .

متوفر منو سنقل لون واحد او باليت من 3 الوان وفي منو بشيمر وفي مات

ببساطة انصح فيه وبقوة ، واعطيه 10 من 10

الالوان حقتي

Lifes a Peach (matte)

Flushed (matte)

Sunrise (shimmer) 

coral (matte)

 Mirrored Pink ( limited edition ) 

(shimmer)

Pomegranate (shimmer)

Rose Gold (shimmer)

Sleek Sweet Cheeks Blush (matte cream ,matte powder,shimmer powder)

Sleek Blush By 3 Pumpkin (shimmer,satin,matte powders)

 السواتشات 

اوكي نجي للشادوز

نفس الشي العلبة انيقة ومرايتها كبيره وعمليه ، يجي معاه اسفنجة الشادو .

الألوان بيجمنتتد مرا، لمن تحطي حطي شوية شويه الين توصلي للكثافه اللي تبيها.

الكواليتي جميل و الالوان والثبات روعه ، بس ملاحظتي على الشادوز انها تتفتت وانتي تستخدميها شويه، فحطي الاساس بعد الشادو احسن .

متوفر منو ألوان مرا كتير من جد لازم تلقي شي يناسب ذوقك ، الحلو كمان انو الباليت فيها الوان شيمر والوان مات يعني تقدري تسوي لوكات غير محدودة بالباليت الواحد.

انصح فيه و تقييمي له 9 من 10

باليتاتي

Sleek Makeup I-Divine 12 Piece Shadow Storm

Sleek I Divine Eye Shadow Au Naturel

السواتشات 

بعد كدا عندي علبة الحواجب، لو تلاحظوا انو شكلها نفس حقت بنفت و نفس الفكره جهه بودرة و جهه واكس.

اول حاجة تحطي من الواكس و بعد كدا تثبتيه بالبودرة، وطبعا ممكن تستخدمي البودره لحالها ذا تبغي الحواجب تكون ابسط.

المنتج رائع مرا، ملاحظتي الوحيدة انو خدي لون افتح منك لانو غامق يعني انا في العادة استخدم الحاجات اللي تجي مديم بس دا اخدت اللايت وطلع ممتاز.

في منو ثلاثه درجات فاتح و متوسط وغامق و يجي مع ملقاط وفرشتين صفيرة. والعلبه جميلة ومرتبة.

انصح فيه وتقييمي 10 من 10

Sleek Makeup Brow Kit light

اخر شي عندي هوا الكونتور باليت

دا الباليت روعه روعه البرونز اللي فيه ممتاز مطفي و مو مرا برتقالي و لامرا بني يعني درجتو مرا مناسبة للكونتور، اصلا انا مرا معجبة بالبلشرز فاتوقعت انو الكونتور باليت حيطلع بطل وطلع عند توقعي.

برضو افضل تاخدي لون افتح لانو الوانه غامقه انا اخدت اللايت و طلع مناسبني.

في منو باليتات بثلاثة الوان (يضيفوا بلاشر) بس انا اخدت الباليت اللي بلونين (برونزر و هاي لايتر)، العلبة تجي بدون فرش بس مرايه .

انصح فيه واعطيه 10 من 10

Sleek Face Contour Kit light 

حتلاحظوا كل شي انصح فيه وعاجبني ههههه لاني دايما احب قبل لااشتري أي شي اكون قريت عنو مضبوط 

وشفت راي الناس فيه، فعارفة بالضبط اش اللي يناسبني .

على فكرة شكل العلب من برا كدا 

اتمنى يكون البوست عجبكم واستفدتوا منو، قولولي اش اكتر شي عجبكم وحمسكم ؟؟

احبكم

مرمر

6 comments Beauty