Soap and Glory addiction part one/ ادمان سوب اند قلوري الجزء الأول

كيفكم ياحلوات

اليوم البوست بالنسبة ليا كان مرا يحمس ، لاني احب احب احب شي اسمه سوب اند قلوري، احبهم من كله سواء من منتجات الحمام والجسم والعناية بالبشرة وموخرا المكياج .

بداية قصة الحب ههههه 

سوب اند قلوري من الماركات اللي اكتشفتها من زمان حتى قبل لااقرا عنهم أي ريفيو ولا عرف عنهم شي، مرا كنت اعاني من جفاف يدي ودخلت اتفرج على كريمات اليد في بوتس وجات عيني على الهاند فود ، طبعا يحقلي هههه الباكجينج يجنن و كمان الاسم حسسني انو دا الشي اللي يدي تحتاجه من جد . حطيت من التستر وخرجت وطبعا ولاساعه رجعت اخدته لانو سوا يدي ناعمه مرا وريحتها جنان .

بعد الهاند فود سار عندي ادمان خلاص وبدي اجرب منهم كل شي و الصراحة كل مااجرب شي يحببني فيهم اكتر مافي شي ماعجبني من عندهم للان.

حاتكلم معاكم عن مجموعتي من سوب اند قلوري في منتجات جربتها و في منهم لسا ماجربتهم وفي منهم خلصته وكررته.

لانه مجموعتي كبيره شويه فقسمت البوستات الى ثلاثه اجزاء

الاول حيكون عن زبدات وكريمات الجسم

التاني حيكون عن المنظفات والمقشرات

الثالث حيكون عن المكياج و المنتجات اللي جربتها وخلصت

اوكي نبدا بسم الله

دي مجموعتي المتواضعه من الزبدات والكريمات حقت الجسم

الزبدات

من اليمين

Soap & Glory The Righteous Butte Body Butter

لو تبغي تجربي شي واحد من سوب اند قلوي خدي الزبدة دي لانه كلمه تجنن قليله عليها و العلبه دي يمكن رابع علبه استخدمها من كتر مااحبها .

الترطيب ممتاز جدا عشان فيها شيا بتر ، تحسي يعطيكي ترطيب مخملي مو دهني والريحة مرا فضيعه، في ناس كتير يشبهو الريحة بكوكو مادموزيل شانيل.

من اليسار

Soap & Glory Butter Yourself Body Cream

الزبدة دي مفعولها وترطيبها نفس الزبدة اللي قبلها جميل مرا ،المختلف هنا الريحة لانه ريحته فريش فروتي لانه ريحه خمسة فواكه مع بعض !!

 لوشنات الجسم

Soap & Glory Glow Lotion

دا عباره عن لوشن جسم يعني الترطيب حيكون اخف شويه، دا اللوشن من مميزاته انه العطر اللي فيه ريحته قويه بس بشكل حلو و كمان يعطيكي لمعه واضاءه صحيه للجسم لانه فيه قلتر، قلتر صغير مرا عشان كدا يبان صحي وحلو.

Soap & Glory Smoothie Star

اللوشن الجميل دا لسا ماجربته بس قريت عنه ريفيوهات تفتح النفس و جربت التيستر في بووتس ومرا عجبني الترطيب والريحة .

ريحته من الروائح اللي تشهي لانه يحتوي على زبده اللوز، زبده الكوكا، لبن، عسل و شوفان، متخيلين كيف يمي.

كريمات اليد والرجل

من اليمين

Soap & Glory Heel Genius

كريم للرجل وبالنسبة ليا من افضل كريمات الرجل ومفضل عندي دي ثالث علبه استخدمها، ترطيبه حلو وريحته فريش تتناسب الرجل لانه على الرجل احلى الروائح الفريش تحسي بالانتعاش.

انا احب استخدمه كانه ماسك يعني ادهن كميه سخيه منه على رجلي في الليل و البس شراب و انام .

من اليسار

Soap & Glory Hand Food

 الهاند فود كريم اليد اشهر واحلى كريم يد و هوا السبب في الادمان اللي عندي .

ومااعرف كم مرا كررته نسيت !! 

احبه مرا كل شي في حلو الترطيب تحسي يترك يدك حرير ،  الريحة ادمان (ريحته نفس ريحه سوب اند قلوي اللي هيا ريحه اول زبدة اتكلمت عنها) .

على فكره انا احب كريم اليد حق لوكسيتان اللي بزبدة الشيا ، بس احب الهاند فود اكتر. سوري لوكسيتان .

منتجات سوب اند قلوري تلقوها في صيدلية بوتس

اوكي ياعسولات دا كان بوست اليوم اتمنى يكون عجبكم واستفدتو منو .

قولولي اش منتجكم المفضل من سوب اند قلوري ، او اذا لسا ماجربتوه متحسمسن تجربو ايش ؟

احبكم

مرمر

2 comments Beauty