كيف
حالكم ياحلوات
اليوم
الريفيو حيكون سريع و خفيف عن البي بي كريم تنتد موسترايزر من تارت ، بصراحة انا
مو من الناس اللي تتحمس على البي بي كريم كتير بس دا شدني لأنه كريم مرطب ملون في
نفس الوقت يعني نوعا ما حسيته عناية بالبشرة و مكياج.
من الأشياء
اللي عجبتني فيه انه خالي من الزيوت ، يعني محا يترك هديك اللمعة المزعجة على
الوجه بالعكس اعطاني لمعه بس لمعه النضارة (الديوي لوك). وكمان محا يكتم الوجه و
يطلع حبوب.
مرا
يندمج بسهوله وكانك قاعدة تحطي كريمك المفضل ، و بالنسبة لتغطيته فهي خفيفة إلى
متوسطة ، و الكريم في نسبة حماية من الشمس اس بي اف 20 وتعتبر نسبة كويسة .
اللي
خلاني أحس اني قاعدة احط عناية ببشرتي اكتر من انه مكياج ، انه فيها المكونات دي :
Amazonian clay, apple extract, camellia extract,
chamomile, vitamins A, C and E, and sodium hyaluronate
كلهم مرطبين و مهدئين للبشرة واهم عنصر منهم هو طين الامازون .
طبعا الجو بدا يسير حار ، و في الحر مااظن احد يحب انه يحط
فاونديشن ثقيل خصوصا الصباح ، فمرا انصحكم فيه الفتره دي .
لمن اخترت الدرجة كان بالنسبة ليا مخاطرة لاني اخترته اون لاين
ماجربته بنفسي في المحل (للاسف مو متوفر هنا) ، اللي ساعدني اختاره هو الصفحة اللي
عاملينها تارت عشان تختاري البشرة الاقرب لبشرتك و هو حيطلع لك درجاتك التقريبيه
من بين كل الفاونديشنز اللي عندهم ،،، شيكو على الصفحة مرا ممتعه و الحمد لله زبطت
معايا الدرجة :
أنا كنت
Light to medium
و الدرجة اللي اخترتها
light-medium -
light to medium skin with pink and yellow undertones (formerly agent 04)
طبعا اخترتها لأنه
فيها اندر تون اصفر
اذا تبغو تعرفوا
اكتر عن الاندر تونز اتكلمت عنه بالتفصيل زمان هنــــــا .
رابط المنتج
شحنت من موقع تارت على البريد الامريكي
ححاول الاقي بديل عنه متوفر هنا في اسواقنا و اذا لقيت اكيد
حأقولكم عليه ، بليز اذا عندكم أي بديل جريتوه قولولي عليه مرا انبسط لمن اجرب
اقتراحاتكم.
مرا شكرا على متابعتكم و تشجيعكم الدايم ، الله يخليكم
ليا
و نشوفكم على خير في التدوينة القادمة
0 comments:
Post a Comment
تسعدني تعليقاتكم أو استفساراتكم :-)