مكرونة بالدجاج والبشاميل \ Pasta with chicken and béchamel

كيف حالكم ياحلوات

اليوم قلت خليني انزلكم طبخة أحبها، مرا سهله و محبوبه عند الكل واهم شي انه في امكانية للتحضير المسبق.

الوصفة اخدتها من موقع منال العالم واعتمدتها، حأحط لكم الرابط تحت، ودحين نبدأ بسم الله ... طبعا غيرت شوييية عن الوصفة الاصليه، عموما انا لازم اغير مدري ليش مااقدر امشي بالمقادير بالضبببط

المقادير

الحشوة

1 كيلو دجاج مسلوق (سلقتها في مويه فيها مكعبين ماجي) 

1 ملعقة صغيره اوريجانو

1\2 ملعقة صغيره بابريكا

البشاميل

ملعقتين كبيره زيت

ملعقتين كبيره زبدة

4 ملاعق كبيره دقيق

3 اكواب حليب (استخدمت نيدو المجفف لانه اطعم في الاكل)

6 مكعبات جبن كيري (خليها بحراره الغرفة مرا تسهل عليكي الشغل و عشان البشاميل ماتتكتل)

ملعقة صغيره ملح

ربع ملعقة صغيرة فلفل ابيض او اسود (الابيض يخلي لون البشميل حلو)

الطبقة العلويه (ترا مرا تعطي فرق لزيز)

1 كوب كريمة سائلة

حبتين بيض

جبن موزريلا

                                         

 وطبعا اهم شي كيس مكرونه

الطريقة

اول شي نسلق الدجاج و بعد مايستوي نفتتوا نحط عليه الاوريجانو والبابريكا ونلخبطهم ونحطه على جنب ،

( هذا الجزء حق التحضير المسبق ممكن تسلقي الدجاج و تقطعيه و تبهريه قبل بيوم ، وكمان ممكن اذا زاد عندك دجاج حق طبخه سابقة تقطعيه و تسويها حشوة للبشاميل)

بعد كدا نبدأ نسلق المكرونه ونسوي البشاميل

بالنسبة للبشاميل

على نار هادئه نحط في قدر الزيت والزبدة والدقيق ونلخبط بالمضرب حق الحليب الين يسير لون الدقيق ذهبي.

نضيف الحليب و نقلب بالمضرب الشبكي الين يذوب الدقيق و يغلي الحليب.

نضيف الجبن و الملح والفلفل. ونقلب، راح نلاحظ انه اتكونت عندنا صلصة متجانسة و ناعمه كده تكون البشاميل جاهزة نرفعها من النار.

دحين نجيب الصينيه ونبدأ في الطبقات

الطبقة الاولى، تجيب ربع كمية البشاميل نلخبطها مع كل المكرونه و نحطها في الصينيه.

الطبقة التانية، حشوة الدجاج.

الطبقة التالته، باقي كمية البشاميل نحطها الى ان يتغطى الدجاج.

والطبقة العلويه، نلخبط البيضتين و الكريمة مع بعض ونسكب الخليط فوق البشاميل.

اخر شي نرش الموزريلا.

ندخل الصينيه الفرن لمدة نصف ساعه، ولاتنسي تحمريها من فوق.

وبالعافيه

جربوها و حتدعولي

الرابط الاصلي للوصفة

http://www.manalonline.com/recipes/%D9%85%D9%83%D8%B1%D9%88%D9%86%D8%A9%20%D8%A8%D8%A7%D9%84%D8%AF%D8%AC%D8%A7%D8%AC%20%D9%88%D8%A7%D9%84%D8%A8%D8%B4%D8%A7%D9%85%D9%8A%D9%84

نشوفكم على خير في التدوينة القادمة

2 comments cooking recipes