ريفيو باليت الشادو ديوال انتيستي من نارس \ NARS Dual-Intensity Eyeshadow Palette Review

كيف حالكم ياحلوات

اليوم التدوينة حتكون ريفيو عن باليت جميل جدا من ماركة احبببببها و هي نارس.

قبل فتره لمن نزلت الشادوهات بالتركيبة الجديدة عندهم اللي اسمها

Dual-Intensity Eyeshadows

مرا مرا كنت متحمسة اجربها بس استخسرت اصرف مبلغ على لون واحد و كمان اون لاين يعني ماجربته بيدي مثلا و قلت فعلا يستاهل تاخديه لوحده. فأجلت الفكرة والحمد لله اني اجلتها لانه نارس نزلوا باليت كاملة فيها 8 الوان من نفس تركيبة الشادو الجديدة.

اول ماشفت صورتها اون لاين جاتني حالة الااا ابغاها من جمال الالوان والفكرة مرا مرا اتحمست لها.

طبعا تقدري تطلبيها من اكتر من موقع متوفرة في اسوس ، نوردستورم .... ححط اللنكات اخر البوست ان شاء الله

التركيبة دي من الشادوهات جدا واضحة و اذا تبغيها مرا توضح اكتر استخدميها مبلله بمويه او فكس بلس اللون يسير خوراااافي جميييل. الفينيش حقتها ساتين يعني فيه لمعه خفيفة مو قوية بزيادة ، ومرا مرا سهله في الدمج و ثباتها عالي.

بصراحة حبيت استخدامه مبلل اكتر بكتير من انه يكون ناشف لانه لمن يكون ناشف يبين كانه شدو بيجمنتد عادي بس لمن يتبلل يسير قوي كانو شدو كريمي ميتاليك.

الالوان الموجودة في الباليت حجمها اصغر من المقاس الاصلي للشادو تقريبا بالنص ، و صراحة دا الشي حلو عشان لو في لون مرا حبيتيه تقدري تروحي تاخديه فل سايز و تستخدميه و تنبسطي بيه ، ولو في لون ماحبيتيه ماتتورطي في حجم كبير .

 7 من الدرجات متوفرة في الشادوهات السنقل بشكل دائم لكن الباليت للأسف ليتمد. الالوان الدائمة هي

Europa, Himalia, Subra, Andromeda, Lysithea, Giove and Sycrox

كلها طبيعيه و حلوة وفيها الوان مرا تجنن للوك السموكي زي النيلي والسيلفر.

اللون اللمتد هنا هو

Ursa Major

مرا جميل لتحديد الجفن الثابت او حتى لحالو .

لاحظوا كمان كيف الباكيجنغ فنان من برا مرايا كتوب عليها و من جوا في الشادوهات مع فرشاه حلوة تقدري تحطي فيها الشدو ناشف او تبلليها وتحطي فيها ، جربت الفرشاه و عجبتني مرا ، وطبعا من جوا في مرايا كمان.

مرا احب اهتمام نارس بأدق التفاصيل ... هنا سواتش من النت ، الصف اللي فوق ناشف واللي تحت مبلل شوفوا كيف الفرق يجنن

http://www.makeupandbeautyblog.com/face-of-the-day-fotd/satiny-lids-red-lips-soft-black-cat-liner-friday-face-day-nars-dual-intensity-eyeshadow-palette/

الاللوان من اليسار

Europa

لون بمبي مشمشي

Himalia

لون روز قولد

Ursa Major

لون بني دافي

Subra

لون بنفسجي غامق زي لون الباذنجان على نقطة بني، دا اكتر لون حمسني في الباليت

Andromeda

لون بين الابيض و البمبي الفاتح على لؤلؤي كده مني عارفة كيف اوصفه ههههه

Lysithea

لون فضي رمادي

Giove

لون نيلي

Sycorax

لون اسود

صراحة مرا انصح في الباليت من اجمل الباليتات اللي استخدمتها ، الالوان كلها تستخدم مافي لون عجيب ، الجودة رائعه يعني كله على بعضه حبيته.

اللنكات اللي تلاقيه فيها

http://shop.nordstrom.com/s/nars-narsissist-dual-intensity-eyeshadow-palette-limited-edition-187-value/3954668?origin=category-personalizedsort&contextualcategoryid=0&fashionColor=&resultback=7100

http://www.asos.com/nars/nars-limited-edition-narsissist-dual-intensity-eyeshadow-palette/prod/pgeproduct.aspx?iid=5042855&clr=Narsissist&SearchQuery=nars&pgesize=36&pge=0&totalstyles=93&gridsize=3&gridrow=4&gridcolumn=2

اتمنى تكون التدوينة عجبتكم واستفدتوا منها ، نشوفكم على خير التدوينة القادمة

Leave a Comment Beauty