Tips and Tricks to make you instantly fresh & awake / نصايح وحيل تخليكي منتعشة و مصحصحة على طول

كيفكم بنات

اليوم حتكلم لكم عن منتجات تخليكي تبيني على طول مصحصحه و مو بس كده حتبين كانك اخده كفايتك من النوم و عملتي جهد عشان تتزبطي. يعني باختصار تفقيعة بعد النوم تروح.

أول واهم حيلة حتيبن انك مرا مصحصحه هي الروج بلون زاهي او زي مانقول فرايحي (فرايحي من فرح هههههه) ، اخترت لكم هنا الفوشي وممكن تختاري الاحمر او الاورنج كمان. الروج القوي يعطي نتيجه فوريه بالنشاط.

وعلى فكره مو بس حيبين انك بذلتي مجهود و فايقة ورايقة ، لا حيغير المود و النفسية للأحسن.

و الارواج الفرايحية الزاهيه مهي مقتصرة لوقت معين من وجهه نظري.

الدرجات اللي اخترتها من اليسار

Urbandecay lipstick cat fight

revlon lip butter lollipop

واذا تبغي تعطي امتلاء اكتر للشفايف انصحك تستخدمي قبل الروج قلم لون طبيعي نيود ، مرا حيفرق في الشكل. من الالوان الحلوه حق دييغو رقم 61 ، كريمي سهل في الرسم ، سعره حلو ومرا حجمه كبير يطول معاكي.

تاني حيلة هي الماسكرا المكثفة ، انا احب المكثفة اكتر من اللي تتطول ، جربي تحطي في عين ماسكرا وعين لا و شوفي الفرق تحسي عينك اتفتحت.

اخترت لكم ماسكرا مس مانجا من لوريال عجبني سوادها ثباتها و فرشتها حلوة تتحرك بمرونه.

ومن اهم النصايح الكحل البيج داخل العين برضو نفس الماسكرا جربي عين ايوه وعين لا شوفي الفرق ، يفتح العين بشكل مرا ماتتخيليه.

ركزوا انا قلت بيج مو ابيض ، الابيض يبان فيك و مو طبيعي.

انصحكم بقلم نارس النيود ، و في كمان من ميبلين من لاين سكاندل ايز بس نسيت اصوره برضو حلو و ثابت.

بالنسبة للوجه فخليكي بسيطة مجرد كريم ملون و كونسيلر لاضاءه منطقة تحت العين و بودرة لتثبيت الكونسيلر، و حاولي ماتكتلي المنتجات، من كل شي حطي قليل عشان لايبان انو مكياج متكلف نحن نبغاه بسيط وفريش.

اخترت الكريم الملون من لورا مرسييه ، مازال تحت التجربه بس مبدأيا جميل.

الكونسيلر اخترت ميبلين فيت مي ، مرا احبه الكونسيلر دا جدا جدا عملي ، درجته حلوة، سهل في الدمج، سعره حلو و متوفر في كل مكان وأهم شي يعطي تغطيه و اضاءه مع نسبة ترطيب. مرا انصحكم فيه.

واثبته ببودرتي المفضله من لورا مرسييه ، هي تثبت و تعطي كمان اضاءه لمنطقة تحت العين.

تعرفوا متى يفتح لورا مرسييه في جدة ؟ مرا قربت تخلص بودرتي ونفسي احس انه دايما هنا لانه حتى كريمات الجسم عندهم مو طبيعيه عشق والله.

طبعا مستحيل يكون شكلك فريش من غير بلشر ، هنا انا افضل البلاشر الكريمي يعطي اضاءه ولمعه صحيه كانه وجههك  كده اصلا.

اخترت الملون من ذابالم ، نفس فكره حق بينفت بس على جل ... دي الملونات حق بنفت وبالم مرا عمليه ممكن تحطيها لحالها كمان و لاحيبان مكياج حيبان بس وجههك مورد.

وطبعا ممكن يستخدم للوجه او الشفايف بس انا احبه على الوجه اكتر لانه ينشف شفايفي.

واخر خطوه هي انك تعبي الفراغات في الحواجب جدا مهم و يعتير كانه برواز للوجه ، حتى لو كانت حواجبك مليانه بس عبي الفراغات خفيف و و وزعي بفرشة السبولي اللي زي الماسكرا ، مرا حتعطي فرق و نتيجه حلوة.

انا حاليا بستخدم حقت سوب اند قلوري و في ماركات كتير يسووها اهمها انستازيا بيفرلي هيلز ، والحمد لله اخيرا اتوفرت في سيفورا عندنا.

الخطوات ممكن تبان كتير بس صدقيني محا تاخد ولاعشرة دقايق و حتغير مزاجك نفسيتك وشكلك للأحسن فأنتي تستاهلي العشرة دقايق دي كل يوم.

اتمنى التدوينه عجبتكم واستفدتوا منها ، نشوفكم على خير التدوينة القادمة.

Leave a Comment Beauty