l'oreal infallible 24h matte foundation review / ريفيو فاونديشن لوريال انفالبل مات

كيفكم ياحلوات

اليوم حتكلم لكم عن فاونديشن انتشر بشكل مو طبيعي الفتره الماضيه ، هو فاونديشن لوريال انفالبل مات، ماكنت مرا متحمستله لانه بشرتي مختلطة تميل للجافة فخفت انه يبين قشور في وجههي بما انه مطفي، بس اش اسوي السوشيال ميديا اثرت فيا واخدته، الموضوع خرج من يدي ههههه.

اول شي التعليب جدا عملي ، عصار و بلاستيك يعني اقفليه و خديه معاكي اي مكان ماتخافي ينكسر و حجمه مناسب.

في درجات متنوعة ، الدرجه اللي اخدتها اغمق مني بتكه بس بتعطيني لوك برونزي حلو.

لمن بدات اوزعه لاحظت انه جدا سهل في التوزيع و تغطيته ممكن نقول انها متوسطة، على فكره وزعته باصباعي وماحطيت باودر الا في انفي لانه المنطقة الوحيده اللي تفرز دهون في وجههي.

الفينيش اللي يعطيه مخملي مطفي ، جدا جدا جميل و لاحظت انه لمن بحطه اكتر من شخص يقولي بشرتك حلوة اليوم اش استخدمتي.

بس الحلو مايكمل للاسف فيه شويه عيوب

طبعا لو تعرفوني مزبوط انا احب اللوك الديوي اكتر من المطفي بسبب بشرتي ولانه في العادة طبيعي اكتر ، الفاونديشن دا لاحظت فيه انه مرا حلو اول 4-5 ساعات ، لكن بعدها يبدا يبين القشور اللي في وجههي يمكن مايبان من بعيد بس من قريب مرا باااين.

لوك مطفي و مخملي لمده 4-5 ساعات حلوين لو في مناسبه بس المشكلة انه التغطيه متوسطه ، لو كانت التغطيه اقوى حيكون بطل.

بس على العموم بالنسبة لفاونديشن من الدرق ستور ، وسعره اقل من 100 ريال فهو جدا ممتاز ، واذا كانت بشرتك دهنيه او عاديه متاكده انه حيناسبك ، التجربه كانت تستاهل و اتمنى تجربوه و تعطوني رايكم فيه لانه انا نفسي احترت في رايي احبه اول كم ساعه بعدين خلاص اكرهه ههههه.

ان شاء الله تكون التدوينه عجبتكم واستفدتوا منها نشوفكم على خير التدوينة القادمة.

1 comment Beauty