Liquid Lipstick Series : theBalm / سلسلة الأرواج السائلة المطفيه : ذا بالم

كيفكم ياحلوات

مستعدين للإجازه ؟؟؟ ولا نفس حالتي مافي اجازة دحين ....

اليوم حنبدأ اول سلسله في المدونة حقتي ، ماجا في بالي اني ابدأ سلسة قبل كده فإن شاء الله تكون تجربه حلوة وخفيفة لينا كلنا.

حتكون عن الارواج السائلة الثابته المطفية ، حمسك في كل موضوع براند معينه و احكيكم تجربتي مع أرواجهم من دا النوع و ححاول يكون الموضوع عبارة عن المختصر المفيد.

اول شي قبل لاابدا السلسة حقولكم ترا كل الارواج السائلة المطفية في الحياة تنشف الشفايف مع الوقت لازم ترطبي مزبوط قبلها ، واذا كنتي تستعمليها يوميا لاتنسي تعبي شفايفك مرطب قبل النوم.

اوكي ... نبدأ بسم الله بأول براند وهي ذابالم

اسم الروج

Meet Matt(e) Hughes Long Lasting Liquid Lipstick

عدد الدرجات في الموقع

12 درجة

سعره

17 دولار

وانا اخدت حقي ايام تخفيض السايبر مانداي ، نزل نص السعر. كيف تعرفي انه في تخفيضات؟ يعلنوا في انستقرام عندهم وعلى فكره مو بس في السايبر مانداي مرات يسوو فلاش كم ساعه كده. 

  

الفلاش يكون احلى من السايبر مانداي لانه مو متوقع فتكون كل البضايع متوفرة. للأسف ولامره لحقته.

الرابط

https://thebalm.com/collections/best-sellers/products/meet-matte-hughes?variant=16700619206

تركيبته

سايله و تميل انها موس شويه كانها كريمه.

ريحته

نعناع. بس ماتدغدغ و تلسع.

ميزاته

الوانه واضحه و جدا جميلة ، تعليبه مميز زي كل منتجات ذابالم.

كل الدرجات تركيبتها زي بعض ، لانه في بعض الماركات تكون باختلاف الدرجات تختلف التركيبة.

عيوبه

لاحظت انه حتى مع الترطيب يجفف اكتر من غيره ، واللون مايثبت اكتر من 5-6 ساعات بدون اكل او شرب .. مع الاكل و الشرب حتى 4 ساعات مايكمل يروح من النص لازم تعيدي عليه.

بشكل عام

مقارنه الجودة بالسعر فهو جدا يستاهل، سواء بتخفيض او بدون.

الدرجات اللي عندي

COMMITTED

لونه نيودي مشمشي على وردي ، اتوقع الاغلبيه حياخدوا دا اللون لانه طبيعي ومافي مجازفة كتير.

CHARMING

المفضل عندي لونه موف على لحمي ، مرا مرا جميل.

ADORING

دا اللون الوحيد اللي فيه مجازفه لانه غامق ، لونه عوووودي جدا فخم.

هنا سواتش للدرجات من النت

اتمنى التدوينة عجبتكم واستفدتوا منها ، هل عجبكم انه تكون التدوينة على شكل نقاط كده و لا سرد المعلومات ورا بعض احلى؟ اعطوني رأيكم .. نشوفكم على خير التدوينة القادمة.

3 comments Beauty