September 2016 favorites / مفضلات سبتمبر 2016

كيفكم ياحلوات

زماااان على موضوع المفضلات ماادري ليش وقفت اسويه مع انه من اكتر المواضيع اللي احب اكتبها واقرأها عند المدونات.

عشان ارجع انتظم في تدوينات المفضلات قررت اخليها خفيفة وسريعة عليا و عليكم ....

اوكي نبدأ بسم الله

The body shop chamomile silky cleansing oil

منظف المكياج الزيتي بالبابونج من بودي شوب .. بشكل عام المنظفات الزيتيه جدا عملية و مريحة للاستخدام اليومي ، تضغطي ضغطة او ضغطتين حسب كمية المكياج و تفركي وجهك و عيونك (على وجه جاف) حتلاحظي المكياج كله بيدوب حتى اللي ضد الموية. و بعد كده غسلي وجههك و حينظف مزبووووط.

و مو بس ينظف من قلب كمان يعطي ترطيب و نعومة للوجه بدون مايبين انه مدهن. يناسب جميع انواع البشرة حتى الدهنية منها.

عيبه الوحيد انه دايما مخلص و صعب تلقيه ، لو لقيتوه خدوا منه كم حبه هههههه.

The body shop piñata colada shower gel

وبرضو من بودي شوب شاور جل البينا كولادا .. محا اتكلم عنه كتير ببساطة لو تحبي الريحة الاستوائية اللي على جوز هند لازم لاااازم يكون عندك كل اللاين دا حق البينا كولادا لانه كل منتج احلى من التاني.

D&G perfect matte liquid foundation

فاونديشن دولتشي اند قابانا المطفي ... كتبت عنه تدوينه كاملة هنــــــا.

l'oreal lumi magique primer

برايمر لوريال اللومي ماجييك ، الحلو في البرايمر دا انه تقدري تستخدميه باكتر من طريقة ، ممكن لحاله يعطي اضاءه وتنوير للبشرة بس طبعا بدون تغطية . لو تبي تغطية اخلطيه مع الفاونديشن تبعك. و لو تحبي اضاءه صحيه للخدود استخدميه على عظمه الخد بعد ماتحطي الفاونديشن.

عن نفسي اكتر استخدام افضله اني اخلطه مع الفاونديشن.

البرايمر يعطي اضاءه و فيه ذرات جدااا صغيره من القلتر فمحا يناسب ذوات البشره الدهنية بس الجافة حيعشقوه.

متوفر في سنتر بوينت و الصيدليات.

bobbi brown foundation stick almond

الفاونديشن ستيك من بوبي بروان بدرجة الموند .. اللون بيرفكت بالنسبة ليا للكونتور والحلو انه الدمج مرا سهل و سريع .. انا استخدم البيوتي بلندر للدمج وجدا عاجبتني النتيجة.

للاسف مافي في جدة بس قريبا ان شاء الله في الاندلس مول . عندهم فرع في الرياض و انا اخدت حقي من دبي.

Urban decay vice lipstick tampered

من ارواج اربان ديكاي الجديدة اللي اطلقوها قريب . الدرجة اسمها تامبرد و تركيبتها كمفرت مات يعني المطفي المريح .. وفعلا مطفي بس تحسيه على كريمي مريح ومايشقق الشفايف و لاينشفها.

حتى ثباته حلو واللون جدا مركز و واضح من اول مسحة.

الدرجة دي اقدر اوصفها انها موف على شوية بني ونتفة روز ،، شوفوا السواتش من النت

جدا جدا رائع ... اذا تحبوا الالوان لازم تروحوا سيفورا و تحوسوا في الالوان الجديدة حقتهم لانها فعلا تزغلل العين وتستاهل.

أقلام الشفايف من المنتجات اللي سرت مااستغني عنها الفتره الاخيره .. مرا ترتب الشكل و كمان تثبت الارواج.

الفتره دي علقت على دول الاتنين

من تشارلوت تيلبوري

Pillow talk

لونه طبيعي حلو مع كلللل الارواج ، في البداية ماعجبني حسيت انه نفس لون شفايفي بس بعدين لاحظت انه مرا يزبط شكل الروج ويرتبه.

جاني هديه من صحبتي ، للاسف مو متوفر هنا ممكن تطلبوه من موقعها او من سلفردجز.

من اربان ديكاي

 conspiracy

لون بني محمر ، جدا كريمي و حلو لو تبي لوك مركز اكتر شي على الشفايف مع رموش و ظل خفيف ياسلام. مرا دافي وان شاء الله حستخدمه كتير في الخريف.

تلاقوه في سيفورا.

Soap and glory archery volume boost brow fiber gel

ماسكرا الحواجب من سوب اند قوري .. زي ماتعرفوني انا مرا احب سوب اند قلوري واحب اجرب كل شي من عندهم ، ودي الماسكرا كانت من ضمن مشترياتي الاخيره حقت بريطانيا.

فيها فايبرز فتعطي كثافه للحاجب ، حتى حتى لو مالك خلق ترسميها بس مشطيه بالماسكرا حيعطيكي لوك طبيعي جدااا.

فكرته تشبه فكره ماسكرا قيمي براو من بينفت ، القيمي براو متوفره هنا في سيفورا.

تلاته فرش من سيقما مرا حابتهم الفتره دي نبدأ من فوق

Sigma E50

جدا حابتها لبودره تثبيت الكونسيلر تحت العين ، شكلها وحجمها بيرفكت لدا الشي طبعا غير نعومتها لانه منطقه تحت العين جدا حساسه فتحتاج شي ناعم و خفيف.

Sigma F35

من احلى فرش الاضاءه لمنطقه عظمه الخد. حتى المنتج تحسي لونه يطلع مزبوووط.

Sigma F10

الفرشه دي معموله انها للباودر او البلاشر ، انا احب استخدمها للكونتور المدموج اللي مو محدد .. كبيره و مبوزه من قدام فتعطيني دا التأثير بسهوله.

Sunday riley Luna oil

زيت الوجه لونا .. محا اتكلم عنه كتير لانه التدوينة القادمة حتكون مخصصه ليه ان شاء الله ترقبوها.

دي كانت مفضلاتي للشهر الماضي ، اتمنى التدوينه عجبتكم واستفدتوا منها ، نشوفكم على خير التدوينة القادمة.

1 comment Beauty