ريفيو باليتات الإضاءة من انستازيا بيفرلي هيلز \ anastasia beverly hills glow kit review

كيفكم ياحلوات

كيفكم بعد العيد ؟ إن شاء الله كان عيدكم حلو وجميل زييكم والله يعيده علينا جميعا بصحة وعافية و نحن 

في أحسن حال.

اليوم اخترت اني اسوي تدوينة عن باليتات الاضاءه من انستازيا . انتشرت كتييييير الفترة الماضية بالذات مع ضجه الاضاءات اللي سايرة دحين. فحابة اعطيكم فكرة خفيفة وسريعه عن المنتجات وهل تحتاجوهم أو لا.

اذا كنتي مجنونه مكياج و اضاءه من غير لاتكملي البوست روحي اشتريه ههههههههه.

اللي نزلوا عندنا في سيفورا كانوا اتنين ، واخدتهم ايام تخفيض البلاك كارد.

ودحين انستازيا نزلت كمان اتنين جداد ومتوفرين كللل الباليتات في الموقع حقها، هنا الرابط للي حابه تتطلب لانه مخلص دايما من سيفورا حقنا:

http://www.anastasiabeverlyhills.com/

الباليتن اللي عندي:

من اليمين اللي لونه على ذهبي

GLOW KIT - THAT GLOW

واليسار لونه على فضي

GLOW KIT - GLEAM

عشان اكون صريحه معاكم انا احترت كتيييير ايت واحد اخد، في الاخير قررت اخد الاتنين خصوصا انه كان اخر يوم تخفيض فكانت فرصة نوعا ما عشان اقنع نفسي هههههه.

الباليت الاولى الذهبيه الوانها ذهبيه برونزيه اكتر ، والتانيه مايلة للصدفي الوردي.

اذا كانت بشرتك متوسطة في الدرجه، الباليتين حيكونوا جدا مناسبين.

أما اذا كنتي مايلة للسمار اكتر فالباليت الذهبيه أحلى عليكي ، والعكس أكيد إذا كنتي مايلة للبياض فالباليت الفضية احلى. لكن كل المكياج ماله حدود طبعا إذا كنتي سمرا او بيضا وتبغي تستخدميه إلا محا تلاقي طريقة مناسبة.

هنا سواتشات للباليتين من النت وعلى كل درجات البشرة (على اليمين الذهبي وعلى اليسار الفضي)

نتكلم بشكل عام عن الباليتين

طبعا الاضاءه مهي فقط لمنطقه اعلى الخد ، ممكن كمان كظلال للعين للأنف لعظمة الصدر ، وإذا تبغي اللمعة تسير أقوى رشي فيكس بلس على الفرشة واستخدميه.

الباكيج على كرتون جدا سميك ، ومافي مرايا .. هم غير متكلفين كتير في التعليب لاحظت الشي دا ، بفكر بعدين اشيلهم كلهم و احطهم في زي باليت ، بالذات انها مصممه بطريقة انه مرا سهل تنشال من الباليت.

الاضاءات حجمها جدا كبير بالنسبة لسعرها ممتازه ، يعني لو ماتبي تشتري اضاءات كتير ،في نفس الوقت 

تبي اختيارات و توفير بجوده ممتازة مرا انصح فيه.

على فكره سعرها ف الموقع 40 دولار يعني اللون الواحد ينزل بعشرة دولار.

البودرة مايحتاج اقولكم ، زببببده ، سهله في الدمج ، ثابته و تبان من اول مسحة.

عن نفسي خفت اندم اني اخدت الاتنين لكن ابدا مو ندمانه بالعكس نفسي اطلب الجدد كمان ، بس ماااسكة نفسي زي الشطار.

انا ماجربت الاضاءت الفردية اللي من انستازيا عشان اقدر اقارن ، لكن مقتنعه باللي عندي ومبسوطه بيهم.

اتمنى التدوينة عجبتكم و استفدتوا منها نشوفكم على خير التدوينة القادمة.

2 comments Beauty