August/September Favorites 2013 / مفضلات شهر اغسطس و سبتمبر 2013

كيكفم ياحلوات

اليوم البوست عن مفضلاتي لشهراغسطس و سبتمبر لانه شهرين فالمفضلات شويه طويلة ،

يلا نبدأ بسم الله

اول شي حبدأ بمفضلات المكياج و هي الاكتر

elf Studio Baked Blushes  Rich Rose

بلاشر من إلف مرا جميل ، اللون واضح و مايفتت يعني مو باودري، يبان طبيعي على البشره ويعطيها لمعه خفيفة و صحيه.

اللون بني على برتقالي بس لمن تحطي على خدودك يبين كورالي برتقالي مايبين بني.

من العيوب فيه الباكيجنج مو عملي و لازم تتطلبيها اون لاين.

صورة سواتش من النت (اول واحد من اليمين)

bareminerals ready blush faux pas

بلاشر من بير مينرال لونه مناسب للاستخدام اليومي وردي هادي، مطفي فيبين طبيعي اكتر، مرا سهل في الدمج و يقعد فتره طويلة.

اذا تبغي بلاشر وردي مثالي انصحك بيه.

تلاقوه ماركه بير مينرال في محلات سيفورا.

صوره سواتش من النت أول واحد من اليسار

bareminerals moxie lipstick get ready

روج من بير مينرال من لاين موكسي، اتعب واقول فضيع اللي يميزه كم شي منها اللون مرا بيجمنتد وقوي يبين معاكي على طول، مرطب جدا وماينشف الشفايف، مريح في الاستخدام ماتحسي بشي يضايق و الباكيجنج فكرتها حلوة.

اللون اللي اخترته تحسيه بنكي روز، فمرا مناسب للصباح و الدوامات لانه خفيف وفريش.

تلاقوه ماركه بير مينرال في محلات سيفورا.

صورة سواتشات من النت

maybelline color tattoo on and on bronze

شادو كورلو تاتو من ميبلين هوا عباره عن شادو كريمي، بالنسبة ليا هوا افضل شادو كريمي في الدرق ستور، واذا تبغي تختاري لون واحد اختاري اللون دا لانه مرا جميل على العين و يستخدم كتير، يعني ممكن تستخدميه كبيس تحت الشادو وممكن تستخدميه لحالو .

انا لو كنت مستعجلة مرا وفي نفس الوقت ابغا احط شادو بدون ماياخد وقت احط منه باصباعي و شويه ماسكرا يلاسلام مافي احلى واسرع من كدا.

ومن ميزاته كمان انه مرا ثابت يعني مايتحرك ابدا فماتقلقي عليه.

ميبلين تلقوها في سنتر بويت.

صورة سواتش من النت

bareminerals ready eyeshadow the hot pursuit

كتغيير من البنيات عموما و من نيكد باليت خصوصا سرت احب احط البلم والموفيات، بالذات لانه الدرجات دي من اكتر الدرجات اللي تناسب العين البنية.

اللونين الحلوين دول يكملو بض واحد فروستي وردي والثاني شيمري موف، انا حبيت الموف اكتر من الفاتح لانو الفاتح مرا ابيض عليا بس الموف مرا ناسبني وسهل في الدمج ويبين مرا جميل على الجفن.

تلاقوا ماركه بير مينرال في محلات سيفورا.

صوره سواتش من النت

stila lip glaze sugar plum

قلوس من ماركة ستيلا، اشتهرت ماركه ستيلا باللب قليز حق الشفايف، و الصراحة هيا جميلة وتستحق المدح، الوانها حلوة و تقعد فتره طويلة، شويه تلصق بس مو بشكل مزعج .

متوفره اون لاين.

صورة سواتش من النت اول واحد من اليمين

bareminerals round the clock waterproof eyeliner 5 PM

بما اني في مود الموفيات دا ايلاينر قلم من بير مينرال لونه موف غامق مرا حتى ممكن يبين اسود، ناعم ويترسم بسهولة وضد المويه .

في جودته حسيته قريب من اقلامي المفضله 24/7 من اربان ديكاي.

تلاقوه ماركه بير مينرال في محلات سيفورا.

صوره سواتش من النت اول واحد من اليسار

elf Lip Liner and blend brush nude pink

قلم للشايف من الف بس فكرته انه جهتين جهه للقلم وجهه للفرشاه حق الدمج، كفكره ماعجبني لاني مااستخدمت فرشته، اللي عجبني فيه انه مرا ناعم وماينشف، وانه لونه نود بس على بنك يعني مو نود كونسيلر (يارب تكونو فهمتو عليا) يعني نود صحي.

جوته حلوة الصراحة منتجات إلف عموما بتبهرني الفتره الماضيه. وبتحمسني اجرب زيادة.

متوفره اون لاين.

صوره سواتش من النت

مفضلات تانيه غير المكياج

No7 Brush Cleaner

منظف فرش من نمبر سفن حلو عملي والعلبه كبيره، طبعا دا حق تنظيف سبوت كلين في وقتها يعني كاستخدام يومي، حبيت فكره الضغاط من فوق مرا عملي ومريح.

نمبر سفن تلقوها في صيدليات بوتس.

laura mercier body souffle in almond coconut milk

سوفليه الجسم الجميل اتكلمت عنه بالتفصيل هنا

sigma flat kabuki brush (f80)

دي الفرشاه حاسميها الفرشاه السحريه لدمج الفاونديشن، تدمج بطريقة حلوة وفلو لس بدون مايسير خطوط، حبيتها مرا سارت شي اساسي في روتيني.

سيقما متوفر اون لاين او عن طريق التاجرات

ساعتي مايكل كورس الروز قولد، الايام دي انا مرا طايحه في الروز قولد ولقيت طلبي عند مايكل كورس، سار لي البسها يمكن اكتر من شهرين ومرتاحه معاها وتمشي مع اغلب الملابس.

   رقم الموديل Mk5314

yankee candle cinnamon stick

شمعه يانكي بريحة اعواد القرفه، للناس اللي يحبوا ريحة القرفة او فطيره التفاح بالقرفة انا متاكده انه الشمعه دي حتعجبكم، وكمان مع اجواء الخريف مرا جيه حلوه الريحة . حابتها الفتره دي وانصحكم تجربوها.

دا كان بوست اليوم اعتذر انو طويل بس اتمنى تكونوا استمتعتوا واستفدتوا منه

اذا عندكم اي سؤال انا موجوه في

تويتر  @murmur_blog

انستقرام murmur_blog

ايميل m.samarkandi@gmail.com

احبكم

مرمر

2 comments Beauty