Best of 2014 Part two\ أفضل منتجات لعام 2014 الجزء الثاني

كيف حالكم ياحلوات

اليوم البوست حيكون تكملة على البوست اللي فات و حيكون عن مفضلاتي المكياجية لسنه 2014 ، طبعا لمن جيت اختار اكتر اشياء استخدمتها و حبيتها السنة الماضية طلعت لي لسته سوبر طويلة فقررت اقلل قد مااقدر ، و في الاخير قللت الاشياء لكمية نقدر نقول انها معقوله و كمان قسمت تحت كل فئه اش اللي حبيته من الدرق ستور و الهاي اند عشان يسير في تنوع اكتر و يناسب الجميع .

للتوضيح :::

الدرق ستور : امثلة لمحلات ( صيدلية النهدي، صيدلية وايتس، صيدلية بوتس، سنتر بوينت..... )

وفي العادة سعرها يكون رخيص الى وسط

الهاي اند : امثلة لمحلات (سيفورا، وجوه، باريس قاليري، دبنهامز ..... )

وفي العادة يكون سعرها غالي

J

طيب يلا نبدأ بسم الله بالمفضلات

الفاونديشن و الكونسيلر

الدرق ستور

Bourjois Healthy Mix foundation

احبة واتكلمت عنه كتييير ، الفاونديشن دا هو الفاونديشن اليومي المفضل عندي ... تغطيته خفيفة لمتوسطة ، يعطي اللوك الديوي بيرفكت للبشره الجافة . ريحته خفيفة و حلوة و الدرجة مناسبتني .

الهاي اند

LancômeTeintIdole Ultra 24H foundation

اتكلمت عنه العام الماضي كافضل فاونديشن وللان مالقيت هاي اند عجبني زيو ،، بس في واحد عاجبني بجربة زيادة و اقولكم عليه ان شاء الله .

الكونسيلر

الدرق ستور

Maybelline Eraser Eye Concealer

افضل كونسيلر جربته ، مايخطط مايتقشر ويغطي كويس ... ندمانه مااخدت الدرجه الافتح عشان اخليه كهايلات ، بس ان شاء الله اجربه بعدين .

الهاي اند

للاسف مالقيت شي مناسبني ... بفكر اجرب ماك برو لونغ وير المدح عليه مو طبيعي :)

الباودر

الدرق ستور

ماجربت شي .. بس يمدحوا بودرة ريميل ستاي مات و بودرة سوب اند قلوري .

الهاي اند

حبيت بودرتين

lauramercier secret brightening powder

mac blotting powder

بودره تحت العين من لورا مرسييه ناعمه ناعمه ناعمه مرا حلوة و ثتبت الكونسيلر و تنور المنطقة.

لكامل الوجه حبيت ماك البودرة الشفافه ، اهم شي عندي في الباودرات انه ماتبين بودريه و تبين قشور (منظر كيكي فيس) لانه بشرتي جافة و يبين فيها على طول و بودرة ماك خفيفة وتحسيها تذوب مع الوجه.

البلاشر

اصعب قسم اختار فيه لانو اعشق البلاشرات بشكل موطبيعي .... و بالقوووووه قلصتهم لاتنين

الدرق ستور

sleek powder blush in life beach

بلاشرات سليك ممتازه مرا سهله في الدمج لونها قوي وتقعد وقت طويل . وصارت اخيرا متوفرة هنا في صيدلية وايتس وبسعر حلو كمان.

اتكلمت عن مجموعتي من سليك بشكل مفصل هنـــــــا

الهاي اند

nars blush in sin

اعشق بلاشرات نارس و حلمي اجمعهم كلهم ، اتكلمت عن المجموعه حقتي هنــــــا

الهايلاتر او الاضاءه

الدرق ستور

Sleek MakeUp Face Contour Kit in light

الهلايتر اللي جي مع الكونتور كت تبع سليك مرا ناعم وحلو .

الهاي اند

BECCA Shimmering Skin Perfector Pressed in OPAL

اتكلمت عنه في تدوينه لحالو من كتر ماحبيته هنـــــــا

البرونزر

الدرق ستور

Sleek MakeUp Face Contour Kit in light

حبيت البرونزر في نفس الكت تبع سليك ، عموما مرا انصحكم بمنتجات سليك خصوصا الباودرات (شادوهات بلاشرات و كونتور)

الهاي اند

chanelsoleil tan de chanel

برونز شانيل مرا جميل هو كريمي و لمن تحطيه مرا يحلي المكياج ويفخمه ، احيانا استخدمه ككونتور واحيانا استخدمه كبرونزر عادي وفي كل الحالات حبيته.

الحواجب

الدرق ستور

Sleek MakeUp Brow Kit in light

الكت تبع الحواجب من سليك مرا احبه يمكن الكل يعرف دا الشي ، مقسم باودر و واكس ممتاااز .

الهاي اند

anastasia brow wiz soft brown

قلم الحواجب من اناستازيا مقسم لجهتين جهه قلم وجهه فرشاه حواجب او سبولي ، يمكن حبيت الفرشه اكتر من القلم، لانه لمن ترسمي بالقلم احيانا يبين شويه حاد بس مع الفرشه بيتنعم و يسير مرا طبيعي و حلو . المنتج مرا بطل و يستحق المدح بس عيبه الوحيد انه يخلص بسرعه و مهو رخيص .

الشادو الباودر

الدرق ستور

L'Oreal Infallible Eyeshadow

الشادو دا من لوريال فضييع صراحه تركيبته و نعمومته و لونه الواضح كانه هاي اند ، عندي الدرجة البنية و متحمسة اجرب درجات تانيه .

الهاي اند

  

حطيت هنا باليتين ، لو كانو عندك يغنوكي عن كل الباليتز ،

لوراك برو الاول ،،، جودة ممتازه لون واضح و مايبهت مرا مرا جميل ، و اجمل فكرة فيه انه صف لماع و صف مطفي يعني تقدري تعملي كم لوك باستعمال الباليت دي لحالها ، مرا انصح فيها .

متوفر عند التاجرات و اون لاين.

الباليت التاني من ذا بالم

thebalm meet matt nude

شادوهات بالم مرا حلوة كمان و الباليت دا الوانه طبيعيه و كلها مطفيه ، مرا عملي و الشادو الواحد كبير و يكفيكي مدة طويلة.

برضو متوفر عند التاجرات واون لاين.

الشادوهات الكريميه

الدرق ستور

Maybelline EyeStudio Color Tattoo 24hr Cream Gel Eyeshadow in And On Bronze

الكولور تاتو من ميبلين راااائع ، لون البرونزي دا مرا جميل لحاله مع ماسكرا الحل السريع للمستعجلات. لمن تحطيه استخدمي اصباعك و ع السريع وزعيه لانه مرا يثبت و بعد كده ماسكرا وانتهيتي ، و طبعا مكن يستخدم كبيس للشادو في حالة تبغي لون اثقل يعني .

الهاي اند

Charlotte TilburyCOLOUR CHAMELEON in AMBER HAZE

دا نفس فكره الكولو تاتو بس اللي عجبني في انه اللون مخصص انه يبرز العيون البنيه ، و هي الميك اب ارتيست عاملة لون لكل لون عين ، مرا جميل و لمن احطه اسهل من الكولو تاتو انه من القلم على طول على الجفن مرا ناعم و كريمي.

تلاقوه اون لاين

الماسكرا

الدرق ستور

Soap & Glory Thick & Fast Super Volume Mascara Superjet Black

ماسكرا سوب اند قلوري مناسبة اكتر للاستخدام اليومي ، تعطي كثافة جميلة وطبيعيه.

الهاي اند

Too FacedBetter Than love Mascara

طلعتلي سامبل سايز مع المجموعه حقت الكريسماس ، حبيتها مراااا من اول طبقة تحسي بالفرق .. عيبها انها شويه تكتل و احيانا الاقي نقط سودا على نظارتي ، بس تهون العيوب قدام مفعولها و ان شاء الله اكيد حجيب الفل سايز.

قلم الكحل

الدرق ستور

Golden lady (black eyeliner)

اممم مااعرف اش اصنفة لانه مايتباع في الصيدليات يتباع في محلات التجميل العادية و سعره رخيص و صناعته المانية ، مرا مرا ممتاز الصراحه مافي فرق بينه وبين حق اربان ديكاي الا انه حق اربان ديكاي في تنوع اكتر في الالوان.

اخدته من ارجوان السويدي الكورنيش

الهاي اند

Urban Decay24/7 Glide-On Eye Pencil in Perversion

اربان ديكاي عندهم اقلامي المفضلة  و من زمان احب القلم دا بس لمن لقيت قولدن ليدي سحبت عليه شويه ، بس كتنوع في الالوان حتلاقوا اربان ديكاي عندهم الوان تتدوخ من جمالها و طبعا جودته مايحتاج ، ممتازه.

الاي لاينر

الدرق ستور

امممممم مافي شي شدني

الهاي اند

Thebalm Schwing

اسود فاحم و مطفي ، و الرسم بيه نوعا ما سهل (لاني مو مرا شاطرة في الايلاينر هههه ) .

الارواج

برضو كان من اصعب الاشياء اللي اختارها فاخترت اتنين من كل قسم

الدرق ستور

Revlon lip butter in pink truffle

زبدات الشفايف من ريفلون هي عشقي احبها احبها احبها  هي عباره عن ارواج بس نسبة الترطيب فيها جدا عالية ، احب كل الالوان اللي عندي .. دا اللون يمكن اكتر لون يناسب الكل لانه طبيعي و حق كل يوم.

ترا ريفلون من احسن شركات الدرق ستور في منتجات الشفايف .

صورة سواتش من النت

أول لون من اليمين

Revlon Super Lustrous Lipstick in  Cherries in the snow

من احسن ارواج الدرق ستور لون واضح و سهل في الاستخدام و كمان في ا سبي اف !! اللون دا مرا جميل انصحكم تجربوه.

ومن اقدم الالوان اللي مازالت مستمرة عندهم

صورة سواتش من النت

الهاي اند

NARS Audacious Lipstick in Audrey

يمكن شفتو الحمرات دي في كل المفضلات وطفشتوا منها ، بس لانها من جد تستاهل ، من افضل التركيبات اللي استخدمتها ، و متحمسه اجرب درجات تانية منهم إن شاء الله .

صورة سواتش من النت

Urban decay Revolution Lipstick in fiend

اتكلمت عن الحلوين دول بالتفصيل هنـــــــا

 

القلوسات

الدرق ستور

revlon lipgloss supernatural

ونكمل عشق ريفلون في الشفايف ، احلى لون قلوس عندهم طبيعي وجميل و مايلصق فيه كل مقومات القلوسات 

الهاي اند، انصحكم فيه وبقوة.

صورة سواتش من النت

خامس لون من اليمين

الهاي اند

bassam fattouh lip gloss in Haifa

اول مرا اجرب من بسام فتوح ، لفتني اسم القلوس اسمه هيفا، مين مايبغا نفس لون شفايف هيفا ههههه ، لونه طبيعي رائع و حلو لحاله و كمان فوق أي روج.

عيبه انه زي ماانتو شايفين تعليبه مرا سيء مبين انه رخيص يعني ريفلون هنا مبين اغلى و افخم منه.

 صورة سواتش من النت

اقلام الشفايف

الدرق ستور

No7 Precision Lips Pencil in nude

من الالوان الاساسيه في كل مجموعه و حبيت تركيبة نمبر سفن حلوة و سهله في الرسم و اذا لونتي شفايفك كلها بالقلم حتفضل ثابته معاكي فتره طويلة.

 

الهاي اند

MAC lip pencil in spice

اللون برضه طبيعي بس دا على بني اكتر ، جميييل و اساسي و طبعا جودة اقلام ماك مايحتاج اتكلم عنها.

بما اني مو مرا مع الاظافر فعندي منتج واحد بس اتكلم عنه

sally hansen insta dri

هو عباره عن توب كوت ينحط فوق المناكير ، لاحظت انه فعلا يخلي المناكير تنشف بسرعه و يعطيه لمعه حلوة و يطول مدته يعني مايتقشر بسرعه . مرا حبيته و مااستغني عنه لمن احط مناكير.

 

بالنسبة للادوات

الفرش اللي حبيتها مرا من سيقما:

E40

افضل فرشاه دمج جربتها ، لازم لازم يكون عند كل واحدة فرشة دمج لانه الدمج اساس الشادو البروفيشنال.

E30

البنسل برش ، مرا حلوة لتمويه الشادو تحت العين.

من زويفا (حعمل ريفيو مفصل عن فرشهم إن شاء الله):

128

فرشاه توزيع البلاشر ، المميز فيها انه حتى لمن بحط لون قوي مايسير زي اللطعه في الخد لا بالعكس مرا يعطي لون ناعم و يندمج بنعومه و سهوله.

 

234

حبيت الفرشه دي لتركيز لون واحد على الجفن المتحرك ، ممتازه مرااااا .

 

228 

حبيتها في كونتور العين مرا البوز حقها بيرفكت.

 

إن شاء الله حتكلم في بوست كامل عن تجربتي لفرش زويفا ، انا جربت منهم مجموعه و كم فرشاه منفردة. للان انا في حالة عشق معاهم.

 

اخيرا اسفنجة الدمج من ريل تكنيك ، حلوة و مرا تخلي الفاونديشن و الكونسيلر فلو لس ، الصراحه للان ماجربت البيوتي بلندر بس اجربها حقارنهم ان شاء الله.

 

مرا معليش البوست سوبر طويل ، بس ان شاء الله حبيتوه و استفدتوا منه.

 

نشوفكم على خير في التدوينه القادمة.

 

 

Leave a Comment Beauty