Empties \ أشياء خلصتها هل حأرجع اشتريها تاني ؟

كيف حالكم ياحلوات و كيف رمضان معاكم ؟ الله يتقبل منا ومنكم الصيام والقيام وصالح الاعمال

اليوم التدوينة هي عباره عن منتجات خلصتها ... هل حأشتريها تاني ؟

مرا احب النوع دا من التدوينات لانه لمن اشوف واحدة تبغا تشتري المنتج مرا تانيه معناها من جد منتج بطل ويستاهل التجربة.

من فتره حطيت كيس و بدات عملية تجميع الاشياء اللي باخلصها ،طبعا في اشياء كتير اخلصها وارميها دايركت مرا انسى احطها في الكيس بس مو مشكلة اتجمع عندي كمية كويسة تحمس لكتابة البوست.

نبدا باول صورة منتجات الشعر

من اليسار لليمين

aussie aussome volume shampoo

كنت اخدته من بوتس بريطانيا على اساس انه يعطي كثافة ، مرا حلو وفعلا يعطي كثاقة للشعر بس مايستاهل انو اطلبوا اون لاين يعني ممكن الاقي بدائل هنا. لو كان متوفر هنا كنت اخدته بدون تردد.

batiste dry shampoo

وهل يخفى القمر ، الشامبو الجاف من بتيست ،كم مره حطيته في مفضلاتي مرا مرا احبه ، وحاليا قاعده اجرب انواع غيره بس ماعجبوني زيو ، كررته وحأرجع اكرره إن شاء الله.

l'oreal ever riche conditioner

بلسم للشعر من لوريال ،هو مخصص للشعر الجاف وانا طبيعه شعري دهني بس احبببببه ، مرا مايدهن شعري بالعكس يعطيه لمعه صحية ، وتتطلع النتيجة احلى لو استخدمتي الشامبو من نفس اللاين.

والريحة مو طبيعي كيف جميلة وتثبت في الشعر ماتروح بسرعه ، مرا احب المنتج دا واتكلمت عنه زمان في واحده من المفضلات.

برضو اخدته من بريطانيا و يستاهل اطلبه اون لاين.

نجي لمنتجات الشاور جل والاستحمام

من اليسار لليمين

victoria secret sensual blush shower gel

شاور جل من فكتوريا سيكرت اخدته ايام التخفيض ، كشاور جل فهو جدا عادي مايفرق عن اي شاور جل في الصيدليه، بس من ناحية الريحة فهي من جد مميزه وجميلة تعطيكي انتعاش وقت الشاور بس عيبه بعد الشاور يروح على طول.

حارجع اشتريه لو كان مخفض ، من غير تخفيض مايستاهل.

soap and glory clean on me shower gel

الحب ، شاور جل سوب اند قلوري .. من غير كلام حارجع اشتريه ان شاء الله لانه مثالي من ناحية الريحة التركيبة حتى الكميه جدا جدا كبيره وتقعد وقت طويل.

كمان اتكلمت عنه كتير في تدوينات مفضلات سابقة لاني من جد اعشقه.

la roche posay cream gel anti irritation

دا الشاور جل او الشاور كريم وصفلي هو الدكتور ايام ماطلعتلي اكزيما في جسمي لانه خالي من العطور و خاص بالبشرة الجافة.

وقتها مرا نفعني ولو لاسمح الله رجعتلي الاكزيما حارجع اشتريه تاني.

laura ashley shower gel

شاور جل من لورا اشلي كان طلعلي هديه من مجموعه من مجموعات بوتس بريطانيا حقت الكريسماس ، المهم جدا فاشل فقط شكله حلو لكن كمنتج فتحسيه تجاري زي حق الفنادق.

ماافكر ارجع اخده ابدا.

نكمل مع منتجات تانيه

من اليسار لليمين

dermacol bb wash

من ديرما كول منظف للمكياج فكرته زي البالم حق الوجه تفركيه على وجهك و تمسحي الميك اب بقطن مبلل ، و حيتمسح كل الميكب .

في البداية كان مرا عاجبني بس بعد فتره اكتشفت منتجات مرا تشبهه ومرا احلى منه ، وحتكلم عنها في المدونه ان شاء الله. يعني ماراح ارجع اخده.

nuxe rose water

زي ماانتو شايفين دي عينه من منظف المكياج من نوكس<< يارب اسمه صح ، على العموم هو فكرته نفس موية التنظيف من بايوديرما بس دا فيه ريحه مويه ورد خفيفة.

كمنتج حلو وينظف كويس ويمكن ارجع اخده لو ابغا اغير عن البايوديرما شوية.

bath and body works sweet pea hand soap

صابونه اليد من باث اند بودي وركس ، انا حاطة في الصورة علبه واحده بس انا متاكده اني خلصت فوق العشره علب منه بروائح مختلفة.

مرا مرا احب صوابين باث اند بودي وركس، بس اخدها وقت التخفيض سعرها قبل التخفيض مايستاهل.

نجي لمجموعه تانيه

من اليسار لليمين

chloe love perfume

عطر لوف من كلوي من احب العطور لقلبي ، ريحته ورد على باودر على شي انثوي جدااا . ماخلصته الا و عندي باك اب منه لانه مااستغني عنه.

elie saab perfume

عطر ايلي صعب ، ريحته تميل للزهور كتير ، احبه و ايوة حكرره إن شاء الله.

bath and body works energy candle

طبعا اللي يعرفني يعرف اني اعشق شموع باث اند بودي وركس مرااا ، دي ريحتها جدا دافية و حلوة، من مكوناتها الزنجبيل و البرتقال، بس ترا مرا ماتحسي بريحة الزنجبيل القوية.

حارجع اكررها ان شاء الله.

و نكمل مع المجموعه ماقبل الاخيرة

من اليسار لليمين

soap and glory heel genius

كريم الارجل من سوب اند قلوري ، يرطب و ريحته انتعاش تحطي منه الليل و تلبسي شراب وتنامي و شوفي النعومه اليوم التاني. مرا احبه وكررته كتير و حارجع اكرره ان شاء الله.

the body shop peppermint foot scrub

مقشر للارجل من بودي شوب ، ريحته انتعاش شي مرا مرا حلو ، وحبيبات التقشير كبيرة تناسب الجلد القاسي حق الرجول ، انا احب استخدمه بعد ماابرد كعوب رجلي.

حاليا بجرب نوع مقشر تاني بس ممكن ارجع له.

soap and glory breakfast scrub

مقشر سوب اند قلوري ، دا المقشر اللي اسمه بريكفاست ريحته بان كيك على فانيلا على سيروب شي مرا يشهي و يجوع، وكتقشير مايحتاج سوب اند قلوري التوب عندي من ناحيه تقشير و ترطيب الجسم.

حارجع اشتريه ان شاء الله.

ونجي لاخر مجموعه من المنتجات

من اليسار لليمين

soap and glory wish upon a jar night cream

كريم الليل من سوب اند قلوري، ترطيبه وتركيبته حلوين وماحسس بشرتي ، و الاحلى من دا كله صراحة الباكجينج ههههه .

ممكن ارجع اخده تاني بس حاليا بجرب منتجات تانيه لليل فمحا اخده في القريب العاجل.

كريمين فوق بعض هنا

الفضي اللي فوق

laura mercier flawless skin tone perfecting cream

دي عباره عن عينة كبيرة اخدتها اون لاين ، مرا سمعت مدح كتير على المرطب دا ، مدح خيالي ، بس للاسف ماحسيت ولابفرق من استخدمته.

محا اشتريه تاني.

من تحت للي لونه اخضر

olay anti wrinkle night cream

كنت فتره برجع اجرب اولاي ، ماادري ليش احس بالحنين تجاه الماركه دي . فاخترت كريم الليل الاخضر.

ريحته وتركيبته حلوين و مرا يرطب، مرا انصح فيه البنات اللي دوبهم بداو يسووا روتين للعناية ببشرتهم.

 ممكن اخده تاني بس حاليا بجرب منتجات عناية تانية لليل.

المنتج الطويل

ren clarifying clay cleanser

منظف الطين من شركة رين ، زي ماانتو شايفين انو العلبه شبه مليانه والسبب اني ماقدرت احبه بأي شكل من الاشكال. ريحته وحشه تركيته ثقيله زي كانه ماسك مو منظف . وحتى بعد ماامسحه مرا ماحبيت ملمس بشرتي.

حاولت احبه على قد المدح اللي قريته عنه بس ماقدرت ابدا.

تحته في

Almond Coconut Milk Soufflé Body Crème

كريم الجسم من لورا مرسييه . اذا تتابعوني من زمان تعرفوا كيف اعشقه و كتبت عنه تدوينة كاملة لحاله هنـــــا ، و ماخلصته الا عندي واحد تاني منه مااستغني عنه.

الشي الواقف التاني

ren eye gel

هو جل للعين من ماركة رين ، مرا عادي ماحسيت بعده بفرق يمكن ميزته الوحيده انه بااارد و يريح تحت العين.

ماراح ارجع اشتريه

واخر منتج للتدوينه هو مرطب النهار من نمبر سفن

no7 protect and perfect day cream

مرا جميل ، ريحته حلوه وترطيبه كمان يجنن ، ممكن ارجع اخده بعدين بس الان مااظن لاني قاعده اجرب منتجات تانية.

اسفه طولت عليكم بس ان شاء الله تكونوا استفدتوا واستمتعتوا بالتدوينة

نشوفكم على خير التدوينة القادمة

2 comments Beauty